U Ispanii zabłakavanyja 140 sajtaŭ ab refierendumie ŭ Katałonii
Viarchoŭny sud Katałonii rasparadziŭsia zabłakavać bolš za 140 sajtaŭ ź infarmacyjaj, jakaja tyčycca refierendumu ab niezaležnaści rehijonu. Pra heta paviedamlaje DW sa spasyłkaj na ahienctva Efe.
U lik zabłakavanych trapiŭ i sajt Nacyjanalnaj asamblei Katałonii. Pry sprobie zajści na jaho pa starym adrasie www.assemblea.cat spracoŭvaje pieraadrasacyja na partał www.assemblea.eu, dostup da jakoha nie zakryty. Na sajcie www.referendum.cat, dzie ŭdzielniki refierendumu, akramia inšaha, mahli daviedacca adras svajho vybarčaha ŭčastka i razdrukavać biuleteń dla hałasavańnia, raźmieščanaje paviedamleńnie na anhlijskaj i ispanskaj movach: «Hety damien zakryty ŭ adpaviednaści z patrabavańniem jurydyčnaha viedamstva i znachodzicca ŭ jaho rasparadžeńni».
Refierendum ab niezaležnaści Katałonii ad Ispanii pryznačany na 1 kastryčnika. Kali bolšaść jaho ŭdzielnikaŭ padtrymajuć hetuju inicyjatyvu, ułady Katałonii majuć namier abviaścić niezaležnaść ad Madryda na praciahu 48 hadzin paśla padviadzieńnia vynikaŭ hałasavańnia.
Ułady Ispanii sprabujuć pieraškodzić praviadzieńniu refierendumu. Palicyja Katałonii atrymała zahad z 29 vieraśnia ŭziać pad kantrol usie vybarčyja ŭčastki rehijonu. «Siońnia my možam paćvierdzić, što paśpiachovy refierendum u Katałonii nie adbudziecca», — zajaviŭ 26 vieraśnia aficyjny pradstaŭnik urada krainy.
Raniej Kanstytucyjny sud Ispanii abviaściŭ refierendum niezakonnym i supiarečnym kanstytucyi, bo asnoŭny zakon nie praduhledžvaje vychadu asobnych rehijonaŭ sa składu krainy. U siaredzinie vieraśnia palicyja kanfiskavała miljony biuleteniaŭ i abstalavańnie dla praviadzieńnia hałasavańnia. Byli zatrymanyja 14 pradstaŭnikoŭ rehijanalnaj administracyi.
