Tak vyhladajuć bunkiery dla miljarderaŭ FOTA
Amierykanskaja kampanija Vivos zajmajecca vytvorčaściu vysokatechnałahičnych bunkieraŭ dla miljarderaŭ, jakija chočuć vyžyć u vypadku katastrofy, ale nie žadajuć rasstavacca z raskošnym ładam žyćcia.
Vielizarnaja łaŭnž-zona, basiejn i kinateatr — takoha nie ŭbačyš u typovych bunkierach. Adnak niekatoryja miljardery hatovyja tracić srodki na raskošnyja prystaniščy, u jakich jany raźličvajuć ratavacca, kali nastupić kaniec śvietu.
Što b ni zdaryłasia ŭ śviecie — zombi-apakalipsis ci jadziernaja vajna — zamožnyja ludzi zaŭsiody zmohuć schavacca ŭ nadziejnych elitnych bunkierach, jakija raźmieščanyja u roznych kropkach śvietu.
Rising S Company, adna ź firmaŭ, jakija zajmajucca budaŭnictvam bunkieraŭ ŭ ZŠA, zaŭvažyła, što sioleta popyt na bunkiery vyras na 200% u paraŭnańni ź minułym hodam. Jaje kiraŭnik Hary Linč rastłumačyŭ, što zbolšaha heta moža być źviazana z rostam zakłapočanaści amierykanskich hramadzian z nahody vajennych vyprabavańniaŭ u Paŭnočnaj Karei.
«Ciapier pahroza vajny ź Iranam ci Paŭnočnaj Karejaj stała bolš realnaj, — skazaŭ jon. — U Paŭnočnaj Karei vielmi biezrazvažny lider. Jamu treba zabaranić dostup da mižkantynientalnych balistyčnych rakiet, jakija mohuć dalacieć da ZŠA i našych sajuźnikaŭ. Mnohich usio heta vielmi niepakoić».
Kampanija Vivos buduje prasunutyja bunkiery, jakija, jak skazana na jaje sajcie, «zdolnyja vytrymać jadzierny vybuch». Adzin z samych papularnych bunkieraŭ kampanii znachodzicca ŭ štacie Indyjana i «nahadvaje kamfartabielny čatyrochzorkavy hatel», u jakim jość kinateatr, abstalavańnie dla spartovych trenirovak, hieatermalnaje aciapleńnie i hadavy zapas paliva.
Inšy bunkier Vivos Europa One u časy Chałodnaj vajny byŭ savieckim. Zaraz jon naležyć pryvatnaj asobie i vyhladaje, jak raskošny majontak z 34 žyllovymi kompleksami, pryčym płošča kožnaha ź ich składaje kala 232 kvadratnych mietraŭ. Unutry jość kinateatr, basiejn, spartzała i raskošnyja vannyja.
Jašče adzin elitny bunkier Survival Condo Project ujaŭlaje saboj 15-paviarchovy žyły padziemny kompleks u Kanzasie. Pavodle sajta kampanii, hety ŭmacavany prytułak zmoža pieražyć jadziernuju vajnu i epidemiju.
