Niahledziačy na vysiłki rasijskaj prapahandy i śpiecsłužbaŭ, u Niamieččynie čakajecca pieramoha Mierkiel
Rasijskija i prarasijskija ŚMI kancentravali ahoń na «kanclarynie», ale heta nie zaškodzili joj zachavać rolu lidarki ŭ niamieckaj palitycy.
U Hiermanii pačalisia parłamienckija vybary, pa vynikach jakich kancler Mierkiel moža pieraabracca na čaćviorty termin. Adnoj ź intryh vybaraŭ źjaŭlajecca vynik, jaki atrymajuć pravyja radykały z «Alternatyvy dla Hiermanii».
Vybarčyja ŭčastki adkrylisia a vośmaj ranicy. Pa vynikach parłamienckich vybaraŭ buduć vyznačany skład bundestaha i skład urada na nastupnyja čatyry hady. Usiaho ŭ vybarach biaruć udzieł 47 palityčnych partyj, kali ličyć lidara honki CHDS/CHSS adzinym błokam.
Adnak u parłamient trapiać, pa dadzienych pieradvybarnych apytańniaŭ, tolki šeść ź ich.
Pavodle apytańniaŭ hramadskaj dumki, pa vynikach vybaraŭ pavialičycca kolkaść partyj u parłamiencie. Da CHDS/CHSS, Sacyjał-demakratyčnaj partyi Hiermanii (SDPH), Levaj partyi i partyi «Zialonyja», što uvajšli ŭ parłamient u 2013 hodzie, dałučacca Svabodnaja demakratyčnaja partyja (SvDP) i «Alternatyva dla Hiermanii» (ADH). Dla prachodžańnia ŭ parłamient partyjam treba pieraadoleć piacipracentny barjer.
CHDS/CHSS užo abviaściŭ, što ich kandydatkaj na pasadu kanclera budzie Anhieła Mierkiel, jakaja ŭznačalvaje ŭrad z 2005 hoda. Za tydzień da vybaraŭ pra svaju padtrymku Mierkiel zajaviŭ 51% niamieckich hramadzian.
Kandydatam u kanclery ad SDPH staŭ Marcin Šulc. Z 1994 hoda jon źjaŭlaŭsia členam Jeŭrapiejskaha parłamienta, a z 2012 pa 2017 hod uznačalvaŭ jaho ŭ jakaści prezidenta. Na pačatku vybarčaj honki, u lutym, Šulc apiaredžvaŭ Mierkiel. Jaho chacieli bačyć kancleram 50% hramadzian, a dziejnaha kanclera - tolki 34%. Fienomien niečakanaj papularnaści navat nazvali «efiektam Šulca». Adnak da vieraśnia jaho rejtynh upaŭ da 25%.
Upieršyniu paśla Druhoj suśvietnaj vajny ŭ parłamient moža prajści pravaradykalnaja partyja: na 12% hałasoŭ vybarščykaŭ pretenduje stvoranaja ŭ 2013 hodzie «Alternatyva dla Hiermanii».
Na vybarach u 2013 hodzie jana nabrała 4,7% hałasoŭ i ŭ parłamient nie prajšła. Papularnaść partyja atrymała na chvali mihracyjnaha kryzisu, jaki pačaŭsia paśla rašeńnia Mierkiel dać prytułak u krainie amal za 1 młn mihrantaŭ dva hady tamu.
ADH prapanuje zakryć miežy — uciekačy pavinny šukać prytułku za miežami ES; vystupaje za vychad Hiermanii z zony jeŭra, za pasłableńnie palityčnych instytutaŭ Jeŭrasajuza i viartańnie bolšaści pieradadzienych na ŭzrovień ES funkcyj nazad nacyjanalnym uradam. Taksama ADH zaklikaje admianić sankcyi suprać Rasii i pačać ciesnaje supracoŭnictva z Maskvoj.
Apytanka
Drukujecca ŭ miežach śpiecyjalnaj rubryki «Naviny Hiermanii»
