Tysiačy čałaviek šukali 10-hadovaha chłopčyka ŭ Biełaviežskaj puščy
U subotu, 23 vieraśnia, praciahvajucca pošuki 10-hadovaha Maksima Marchaluka ŭ Biełaviežskaj puščy. Chłopčyka šukajuć ŭžo vośmyja sutki. Heta samaja maštabnaja pošukavaja apieracyja ŭ našaj krainie. Usiaho na pošuki dziciaci siońnia vyjšła kala 2000 čałaviek, paviedamlajeTut.by.
Fota: Kaciaryna Hardziejeva, TUT.BY
U viosku Novy Dvor Śvisłackaha rajona ŭ subotu jeduć ludzi z usioj Biełarusi, čakajecca prybyćcio atradaŭ pošukavikaŭ ź Viciebska i Homiela. Siońnia dla ŭdziełu ŭ pošukava-vyratavalnaj apieracyi zarehistravana kala tysiačy vałancioraŭ, dziejańni jakich kaardynuje atrad «Anioł». Taksama dzicia šukajuć ratavalniki, vajskoŭcy, milicyja, pamiežniki, leśniki.
U 9 hadzin ranicy było ahulnaje pastrajeńnie, ludziej padzialili na atrady i rasstavili pa pierymietry lesu. Kožnamu atradu vyznačyli kvadrat dla pošuku. Atrad vałancioraŭ supravadžajuć pa dva rabotniki MNS.
Nad lesam latajuć 3 bieśpiłotniki, niekatoryja vałanciory pračesvajuć terytoryju na kvadracykłach. Nočču pošuki nie spyniajucca, śpiecyjalisty ź ciepłavizarami vychodziać u les i šukajuć dziciaci.
Siońnia ratavalniki atrymali infarmacyju ad vałancioraŭ, jakija znajšli zakinutyja chaty ŭ bałocistaj miascovaści. Tudy adpraviŭsia atrad supracoŭnikaŭ MNS, adnak chłopčyka tam nie akazałasia.
Z kožnym dniom pošukava-vyratavalnaj apieracyi arhanizacyja stanovicca ŭsio lepš, ludzi pracujuć bolš zładžana.
Nahadajem, chłopčyk źnik u Biełaviežskaj puščy viečaram u minułuju subotu. Kala 20.00 chłopčyk źjechaŭ na rovary ŭ bok lesu kala vioski Novy Dvor i źnik. Milicyjanty vyjavili ŭ lesie rovar dziciaci.
Na žal, na poźni viečar chłopčyk pakul nie znojdzieny. Pošuki buduć praciahnutyja ŭ niadzieli z ranicy.
