Ksienija Sabčak maje namier bałatavacca ŭ prezidenty Rasii
Prezidenckija vybary ŭ Rasii projduć praz paŭhoda — 18 sakavika 2018-ha. Kandydatura Sabčak u jakaści sparynh-partniora padabajecca ŭ Kramli. Ułady chočuć zabiaśpiečyć jaŭku na vybary, uvahu da ich. U toj ža čas u Pucina chočuć, kab kandydatam ad apazicyi staŭ niechta, daloki ad kłopatu i kaštoŭnaściej šarahovaha rasijanina. Miž tym staraja psieŭdaapazicyja — Ziuhanaŭ i Žyrynoŭski — pryjełasia.
Tym časam pakul Sabčak biespaśpiachova šukaje načalnika pieradvybarčaha štaba. Z prapanovaj jaho ŭznačalić jana źviartałasia da hiendyrektarki kanała «Dožd́» Natalli Sindziejevaj, stvaralnika fondu «Śpid.Centr» Antona Krasoŭskaha, žurnalista Michaiła Zyhara, palittechnołaha Stanisłava Białkoŭskaha dy inšych. Ale nichto ź ich nie pahadziŭsia pracavać na kampaniju Sabčak, piša rasijskaja słužba Bi-bi-si.
Pry hetym dva čałavieki z tych, kamu televiadučaja prapanoŭvała hetu pasadu, raspaviali, što ideju vyłučycca ŭ prezidenty žurnalistcy padkazali ŭ Administracyi prezidenta. Pa ich słovach, prajekt joj spadabaŭsia, ale biudžetu nie vydzielili, tamu na dadzieny momant niama jasnaści, za što jana źbirajecca vieści pieradvybarčuju kampaniju.
«Sabčak taki čałaviek, što pojdzie na vybary, tolki kali Pucin skaža joj: «treba». A kali jon tak nie skaža, to jana nie pojdzie», — zajaviŭ były supracoŭnik Kramla.
Sama Sabčak nie paćvierdziła, što pojdzie na vybary, ale i nie admaŭlała hetaha. Jana zajaviła, što vymušany adpačynak na kanale «Dožd́» źviazany z tym, što zajmajecca novym žurnalisckim prajektam.
