Adkryłasia vystava FOTA z «Biełaruskaha eratyčnaha falkłoru»
Ciaham miesiaca ŭ muziei Pietrusia Broŭki na Karła Marksa ŭ Minsku možna budzie palubavacca fotazdymkami studyi «Pilihrym».
Adna z udzielnic prajektu Nastaśsia Zotkina.
«Biełaruski eratyčny falkłor» vyjšaŭ bolš čym hod tamu. Vydańnie kaardynavaŭ Hleb Łabadzienka, i, napeŭna, usie cikaŭnyja ŭžo paśpieli acanić hłybiniu vobrazaŭ i mietafar narodnych tekstaŭ.
Razynkaj knihi byli zdymki, jakija admysłova dla zbornika padrychtavała siamja Arakčejevych. Michaś i Kaciaryna prydumali dla vizuału svaju kancepcyju, tamu heta nie było adlustravańniem źmiestu, a, chutčej, dapaŭnieńniem ci navat druhoj samastojnaj linijaj. Ciapier heta tym bolš vidavočna, inakš vystavy nie było b.
Źmicier Zavadski, jašče adzin udzielnik prajektu.
Cikava, što dzień adkryćcia, 20 vieraśnia, supaŭ z 15-hodździem šlubu tvorčaj pary. Choć Michaś i Kaciaryna zapeŭnivajuć, što jany tut nie pry čym — vypadkovaść.
«U nas z Kaciarynaj daŭno była zaduma zrabić štości pryhožaje ź niejkim intymnym padtekstam i mocnym biełaruskim markieram. My niešta dumali, płanavali i adnačasova znajomilisia ź biełaruskim piesiennym falkłoram, Kaciaryna pačała šmat śpiavać. My adkryli dla siabie hety falkłor i vyłučyli cikavuju temu, jakuju možna nazvać lirykaj kachańnia. Tut asnoŭny vobraz — maładaja dziaŭčyna, jaje pryhažość, jaje pieražyvańni, pačućci. I nam zachaciełasia heta prailustravać i nadać vieršam bolš realistyčnaje hučańnie», — tłumačyć Michaś.
Michaś i Kaciaryna Arakčejevy.
Tamu kali Hleb Łabadzienka źviarnuŭsia z prapanovaj prailustravać «Biełaruski eratyčny falkłor», Arakčejevy doŭha nie vahalisia i ŭzialisia za pracu. Michaś kaža, kali b nie hety šturšok, moža, i nie dajšli b ruki ažyćciavić svaju zadumu, ale tut usio syšłosia.
«My jašče chacieli źviarnuć uvahu na toje, jaki skarb my majem u vyhladzie biełaruskaj pieśni. Tamu što ścipłyja radki narodnaj liryki časam byvajuć hienijalnymi. My chacieli pieradać svajo zachapleńnie hetymi pieśniami, hetaj miełodykaj, hetymi šykoŭnymi tvorami narodnaj paezii», — zaznačyła Kaciaryna.
