Dziŭny vypadak u Maładziečnie: siamiejnaja para zabyłasia na vulicy ŭ torbie $14 500. Hrošy znajšlisia, a torbu skrali
Kurjozny vypadak sa ščaślivym vynikam zdaryŭsia ŭ Maładziečnie 8 vieraśnia. Kirujučysia na lecišča, siamiejnaja para zabyłasia na vulicy sumku z rečami i bujnuju sumu hrošaj.
Jak raspavioŭ kraj.by namieśnik načalnika pa ideałahičnaj rabocie Maładziečanskaha RAUS Uładzimir Vasilkoŭ, muž, žonka i dvoje dziaciej źbiralisia na lecišča.
U sumku z rečami jany pakłali i skrynku ad mabilnaha telefona, dzie znachodzilisia 14 500 dalaraŭ. Siamja vyjšła na vulicu, sieła ŭ aŭtamabil, a sumku, pakinutuju pobač z mašynaj, zabyłasia. Haspadary chapilisia jaje, tolki pryjechaŭšy na daču.
Pa słovach U. Vasilkova, žančyna adrazu patelefanavała ŭ milicyju. Supracoŭniki Maładziečanskaha RAUS, što pryjechali na miesca zdareńnia, ničoha nie znajšli. U pošuka hrošaj viarnulisia ŭ horad i muž z žonkaj.
U adnym sa śmiećcievych bakaŭ apierhrupa znajšła raskidanyja rečy, što raniej lažali ŭ torbie, a taksama skrynku ad mabilnaha telefona. U joj znachodziłasia roŭna 14 500 dalaraŭ. Ale samoj zvyčajnaj haspadarčaj torby siarod śmiećcia nie było.
Jak rastłumačyŭ supracoŭnik milicyi, haspadynia torby ŭ zajavie pakazała, što jana nie pradstaŭlaje dla jaje materyjalnaj kaštoŭnaści i pryciahvać da administracyjnaj adkaznaści haradžanka nikoha nie choča. Adnak, padkreśliŭ Uładzimir Vasilkoŭ, za prysvajeńnie znojdzienaj majomaści ŭ adpaviednaści z artykułam 10.6 KoAP Biełarusi praduhledžana administracyjnaja adkaznaść — papiaredžańnie abo štraf da piaci bazavych vieličyń.
