Na vučeńniach «Zachad-2017» viertalot vypadkova daŭ załp pa naziralnikach? Jość paranienyja VIDEA
Z-za zboju vajennaj techniki dva čałavieki apynulisia ŭ špitali. Imavierna, incydent adbyŭsia niezadoŭha da vizitu na palihon kiraŭnika Rasii Uładzimira Pucina.
Voś videa incydentu:
Na čarhovym etapie rasijska-biełaruskich vajskovych vučeńniaŭ «Zachad-2017» adbyłosia zdareńnie: na palihonie «Łužski» pad Sankt-Pieciarburham adbyŭsia mižvolny pusk rakiet kłasa «pavietra-ziamla» ź viertalota Ka-52, paviedamlaje Echo Moskvy.
«Jany lacieli na celi, zastavałasia mietraŭ 500, pa zadańni na bajavym šlachu ŭklučajucca łancuhi ŭzbrajeńnia, jany ŭklučyli, ale tam niešta zakaracili, i rakiety pajšli sami. U askiepkaŭ raźlot vialiki, zhareli jak minimum dva aŭtamabili, dva čałavieki atrymali ciažkija traŭmy, ciapier jany znachodziacca ŭ špitali. Heta była treniroŭka pierad niejkaj pakazuchaj. Paciarpieli, chutčej za ŭsio, žurnalisty», — paviedamiła sajtu 66.RU daśviedčanaja krynica.
Dakładnaja data, kali adbyłosia zdareńnie, nieviadomaja. «Heta adbyłosia ŭčora, ci pazaŭčora», — raspavioŭ surazmoŭca.
Paźniej pres-słužba zachodniaj vajennaj akruhi (ZVA) udakładniła padrabiaznaści incydentu.
Adznačajecca, što raspaŭsiudžanaje ŭ internecie videa, dzie viertalot stralaje pa hramadzianskich mašynach, źniata nie na «Zachadzie-2017», a ŭ inšy čas, i nichto nie paciarpieŭ. Paškodžańni atrymaŭ tolki adzin hruzavik. Kali mienavita heta adbyłosia, nie ŭdakładniajecca.
«Na vykładzienych u sacyjalnaj sietcy videakadrach zafiksavany vypadak, jaki adbyŭsia ŭ inšy pieryjad času, kali ekipažy viertalotaŭ armiejskaj avijacyi ŭ ramkach lotna-taktyčnaha vučeńnia adpracoŭvali praktykavańnie pa paražeńni naziemnych celaŭ. Sistemaj naviadzieńnia adnaho ź viertalotaŭ byŭ ździejśnieny pamyłkovy zachop celi. U vyniku traplańnia niekiravalnaj rakiety atrymaŭ paškodžańni adzin z hruzavych aŭtamabilaŭ bieź ludziej», — rastłumačyli ŭ pres-słužbie ZVA.