Kreml płanuje źniać subsidyi DNR i ŁNR na karyść Kryma
Daručeńnie Minfinu Rasii «vyklučyć z prajekta fiederalnaha biudžeta na 2018 hod i na płanavy pieryjad 2019 i 2020 hadoŭ u poŭnym abjomie vydatki na akazańnie ŭ 2019-2020 hadach humanitarnaj padtrymki asobnym terytoryjam» było dadziena pa vynikach narady ŭ vice-premjera RF Dźmitryja Kazaka 1 vieraśnia.
Samaabvieščanyja «respubliki» DNR i ŁNR mohuć z 2019 hoda nie atrymać pa mienšaj miery častki dapamohi z rasijskaha biudžetu — hetyja resursy dapamohuć prafinansavać budaŭnictva i madernizacyju infrastruktury Kryma i Kalininhradskaj vobłaści, paviedamlaje RBK.
U adkrytych dakumientach pa rasijskimu biudžecie RBK nie znajšoŭ farmuloŭki «humanitarnaja padtrymka asobnych terytoryj» abo padobnaj na jaje. Pa słovach fiederalnaha čynoŭnika i dvuch krynic, blizkich da Kramla, za hetaj farmuloŭkaj staić dapamoha samaabvieščanym respublikam Danbasa.
Z pratakołu narady ŭ Kazaka vidać, što premjer-ministr Rasii Dźmitryj Miadźviedzieŭ minułym letam daručyŭ zabiaśpiečyć finansavańnie «biezumoŭnaj realizacyi» mierapryjemstvaŭ pa sacyjalna-ekanamičnym raźvićci i zabieśpiačeńni transpartnaj i infarmacyjnaj biaśpieki Kryma, Sievastopala i Kalininhradskaj vobłaści. Pra heta daručeńnie sam Miadźviedzieŭ kazaŭ padčas pajezdki ŭ Krym u pačatku žniŭnia.
Ahulnaja suma, pad jakuju treba znajści finansavaje zabieśpiačeńnie, składaje 165 młrd rasijskich rubloŭ [kala $ 2,8 młrd] na try hady, padličyŭ RBK pa pryviedzienych ŭ pratakole narady źviestkach. Akramia Krymu jana ŭklučaje vydatki na budaŭnictva vałakonna-aptyčnaj linii suviazi pa dnie Bałtyjskaha mora da Kalininhradskaj vobłaści, pabudovu troch paromaŭ dla čyhunačnaj paromnaj pierapravy Uść-Łuha - Bałtyjsk (Kalininhradskaja vobłaść), a taksama na pryjarytetny prajekt «Farmiravańnie kamfortnaha haradskoha asiarodździa».
Raźmierkavańnie srodkaŭ idzie na karyść tych rehijonaŭ, jakija Rasija ŭ lubym vypadku nie źbirajecca addavać, a voś u budučyni statusu danbaskich respublik jana nie ŭpeŭnienaja, dadaje pieršy vice-prezident Centra palityčnych technałohij Alaksiej Makarkin.
Mierkavanaje vyklučeńnie ź biudžetu «humanitarnaj padtrymki», na jakuju moh by spadziavacca Danbas, - heta tolki adna z prapanavanych krynic dadatkovaha finansavańnia Kryma i Kalininhrada naroŭni z mahčymym pavyšeńniem akcyzaŭ na bienzin, skaračeńniem subsidyj RŽD i šeraham inšych mier, hrašovy efiekt jakich u dakumiencie nie paznačany. Usie jany ŭ sukupnaści pavinny zabiaśpiečyć finansavańnie mierapryjemstvaŭ na 165 rub. Tamu acanić, kolki vydatkoŭvajecca ź biudžetu na «humanitarnuju padtrymku» DNR i ŁNR, pa dakumiencie, jaki jość u rasparadžeńni RBK, niemahčyma.
Akramia taho, surazmoŭcy RBK - dźvie krynicy ŭ Dziarždumie i adna va ŭradzie - padkreślivajuć, što, navat kali ŭłady i vyrašyli spynić vydatki na «humanitarnuju padtrymku» Danbasa, heta nie aznačaje, što finansavaja padtrymka samaabvieščanych respublik spynicca. Finansavańnie DNR i ŁNR całkam zasakrečana, apisvajecca sakretnymi pastanovami (rasparadžeńniami) ŭrada, zakrytymi radkami ŭ biudžecie, kaža adzin z krynic RBK.
U presie tolki niekalki razoŭ nazyvalisia ličby mahčymaj rasijskaj dapamohi niepryznanym respublikam Danbasa. Ahienctva Bloomberg paviedamlała sa spasyłkaj na krynicy ŭ samaabvieščanych respublikach, što Rasija štomiesiac pieraličvaje DNR 2,5 młrd rasijskich rubloŭ na vypłaty piensij (rasijski Minfin paźniej abviarhaŭ, što ŭ rasiejskim biudžecie jość vydatki na takija vypłaty). U lutym 2017 hoda Słužba biaśpieki Ukrainy śćviardžała, što biudžetam ŁNR na pieršy kvartał hetaha hoda praduhledžana pastupleńnie zvyš 11 młrd rasijskich rubloŭ, ź jakich prykładna 9 młrd — nibyta dapamohu rasijskaha ŭrada.
Pavodle MNS RF, sa žniŭnia 2014 hoda ŭ Danbas nakiravana 68 aŭtakałon, jakija dastavili bolš za 70 tys. ton humanitarnych hruzaŭ.
U krasaviku 2017 hoda Rosrezierv paćviardžaŭ, što akazvaje «humanitarnuju padtrymku» mietałurhičnym pradpryjemstvam Danbasa za košt najaŭnych u ahienctva materyjalnych reziervaŭ. A paśla hetaha ŭrad vydzieliŭ Rosreziervu 10 młrd rasijskich rubloŭ na adnaŭleńnie zapasaŭ materyjalnaha reziervu ŭ častcy syraviny i materyjałaŭ mietałurhičnaj pramysłovaści, što mahło być źviazana z dapamohaj Rosrezierva pradpryjemstvam Danbasa.
Akramia taho, Rasija, iznoŭ ža ŭ ramkach «humanitarnaj padtrymki», pastaŭlaje elektraenierhiju ŭ ŁNR. U biudžecie DNR jość «humanitarnaja dapamoha» jak krynica dachodnaj častki, vynikaje z dadzienych Ministerstva finansaŭ DNR, ale sami biudžety niepryznanyja respubliki nikoli nie raskryvali.
