Dzieviać vosieńskich łukaŭ z podyumaŭ, jakija možna sabrać u kramach mas-markietu
Dyzajniery nie śpiać, i ŭžo daŭno vyrašyli, što budzie modna ŭ novym siezonie: abjomnyja rečy, futra, čyrvony koler, bliskučy abutak…
My zhaniali ŭ niekatoryja minskija kramy i adšukali tam rečy, jakija adpaviadajuć tamu, što dyktuje nam moda. Kali vy jašče nie paśpieli ŭciaplić harderob, voś dzieviać łukaŭ, ad jakich možna śmieła adšturchoŭvacca pry stvareńni aktualnych vobrazaŭ.
Dla ofisa
Ahulny košt: 127,7 BYN. Vobraz z kramy LC Waikiki.
Ujavicie, što vy ŭ 70-ch, i śmieła apranajcie na siabie abjomnyja mužčynskija kaściumy. U trendzie žakiety z futra i štany z vysokim pojasam, a taksama smokinhi. Čym bolš kletki, tym lepš. Pryčym niezvyčajnaj i roznaj: vierch moža być z adnym vidam pryntu, a niz — ź inšym.
Košt: 143 BYN. Vobraz z kramy Sisters.
Znoŭ rulić čorny koler (tatalny i biaskoncy), a taksama čyrvony. Vohnienna-čyrvonyja sukienki i spadnicy — favaryt siezona-2017. Kali chočacca cikavych detalaŭ, to raim źviarnuć uvahu na rečy z karunkami i bantami. Ramantyčnaść u adzieńni dyzajnieraŭ źjaviłasia jašče ŭ minułych siezonach, ale ŭsio jašče nie zhubiła aktualnaść. Boty ŭ styli hranž znoŭ buduć u temu, tamu apranajcie śmieła.
Košt: 238,97 BYN. Vobraz z kramy Reserved.
Svaju rolu na modnaj scenie praciahvaje hrać skura, asabliva čornaja, i tufli z vostrym nosam. Zamianicie ich uviečary na masiŭnyja boty, nakińcie źvierchu takuju ž skuranuju kurtku — i možna adpraŭlacca na Zybickuju. Vobraz Trynici z «Matrycy» — heta samy pisk, tak usim i pieradajcie.
Na kožny dzień
Košt: 199,5 BYN. Vobraz z kramy LC Waikiki.
Kali chočacca kryšačku pachulihanić — nie strymlivajciesia. Biejsbołka, kašula svabodnaha kroju (nijakich prytalenych), džynsoŭka, krosy i viasioły zaplečnik — voś łuk dla aktyŭnaj dziaŭčyny. Kali abirajecie novuju džynsavuju reč, spyniajciesia na ciomna-sinim kolery. Mienavita jaho rajuć abirać dyzajniery.
Košt: 439,95 BYN. Vobraz z kramy Reserved.
U hetym vobrazie spałučajucca amal usie hałoŭnyja trendy: a-la brytanskaja kłasičnaja kletka, modnyja kolery i elehantny bliskučy abutak. Niezvyčajnaj detallu ŭ takim strohim kamplekcie niachaj stanie zaplečnik ź jarkim malunkam.
Košt: 200 BYN. Vobraz z kramy Sisters.
Źviartajcie ŭvahu i na niudavyja adcieńni ŭ vopratcy: praŭda, aściarožniej z hetym koleram, jon pasuje daloka nie ŭsim. Vialikija nakładnyja kišeni — jašče adna modnaja detal, jakaja, miž inšym, u dadatak vielmi karysnaja, bo možna sahreć ruki.
Dla vychadu na Zybickuju
Košt: 309,96 BYN. Vobraz z kramy Reserved.
Abjomnyja puchaviki, palito i kurtki — heta nie tolki modna, jany jašče i vydatna spraŭlajucca z sahravalnaj funkcyjaj. Źviartajcie ŭvahu na futra i futravyja ŭstaŭki. Kasmatyja rečy — hałoŭny spadarožnik usich modnic nie tolki na hetuju vosień, ale i na zimu. A kab vobraz byŭ nie takim masiŭnym, apranajcie pad niz ramantyčnyja sukienki ci spadnicy z aksamitu — materyjał aktualny nie tolki dla vierchniaj vopratki, ale i dla abutku.
Košt: 175,5 BYN. Vobraz z kramy LC Waikiki.
Jak vy ŭžo zrazumieli, čym bolš niezvyčajnym budzie vaš abutak, tym lepš. Heta mohuć być futurystyčnyja krasoŭki, fihurystyja abcasy (u vyhladzie čaračak, kosak ci klinapadobnyja, kali chočacie) z upryhožvańniami i niezvyčajnymi vyrazami — nie bojciesia ekśpierymientavać.
Skura, šoŭk i inšyja materyjały ź mietaličnym blaskam zdavać pazicyi nie źbirajucca. Kali vy baiciesia vyhladać jak hierainia z budučyni, možacie źviarnuć uvahu na kaśmičnyja aksesuary: naprykład, kłatč, zaplečnik ci abutak.
Košt: 262,4 BYN. Vobraz z kramy Sisters.
Padkreślić formy možna šyrokim pojasam. Dyzajniery rajać vykarystoŭvać jaho pry luboj mahčymaści: padviazvać kardyhan, nakidku, ponča ci abjomny švedar z kažuchom. Što tyčycca kałhotak, bieź jakich vosieńniu i zimoj nijak, to lepš abirać jarkija kolery. Pryčym kali jany nie pieraklikajucca z asnoŭnaj hamaj, to tak jašče i lepš.
Kali vy znajšli ŭ adnym z hetych vobrazaŭ siabie, to sabrać taki samy łuk možna ŭ kramach handlovaha centra «Halereja Minsk».
