Kava ad Šapena, abo Kavavy łajfchak našych prodkaŭ — heta treba pakaštavać
Pra cikavy napoj z unikalnymi jakaściami i historyjaj piša čytačka Natalla Ružyckaja.
Za smuhoju času zastajucca nie tolki histaryčnyja padziei, ale i tradycyi, zvyčai, recepty straŭ dy napojaŭ. Pani Hłabalizacyja naviazvaje nam svaje standarty charčavańnia i dyktuje, što treba pić dy jeści. Ale ž časam vielmi karysna zrabić nievialički ekskurs u hastranamičnaje minułaje, chaj sabie i nie nadta dalokaje.
Tak, ludzi stałaha vieku, napeŭna, čuli pra smačnuju žałudovuju kavu. Chtości, moža, navat pamiataje jaje vytančany arechavy smak. Ale dla sučasnaha pakaleńnia heta dakładna pusty huk. Tym nie mienš,
napoj z žałudoŭ abo prosta žałudoŭka zusim nie vypadkova byŭ u pašanie ŭ našych prodkaŭ na praciahu mnohich stahodździaŭ. Dyj što ŭ prodkaŭ — sam Šapen, pa ŭspaminach jaho sučaśnikaŭ, adnosiŭsia da «żołędziówki» ź vialikim pijetetam.
Ludzi daŭno zaŭvažyli, što tanizujučy napoj z žałudoŭ stanoŭča ŭpłyvaje na zdaroŭje, a sučasnyja vučonyja vyśvietlili, što žałudoŭka źjaŭlajecca krynicaj mnohich vitaminaŭ i minierałaŭ dy i ŭvohule vałodaje ŭnikalnymi jakaściami. Da prykładu, žałudovaja kava dapamahaje nie tolki adoleć branchit i cystyt, ale i źnižaje ŭtrymańnie cukru ŭ kryvi, pavyšaje imunitet. U adroźnieńni ad tradycyjnaj kavy, žałudoŭka nie vymyvaje z arhanizmu toj ža mahnij, a, naadvarot, zabiaśpiečvaje im spažyŭca. U dadatak, adsutnaść kafieinu dazvalaje častavacca hetym napojem ciažarnym žančynam, dzieciam i tym, kamu pa miedycynskich pakazańniach zabaroniena ŭžyvać zvyčajnuju kavu.
Adnym słovam, vierasień — samy čas, kali možna iści nie tolki ŭ hryby, ale i pa žałudy. Viadoma ž, treba źbirać vyklučna zdarovyja, nie paškodžanyja kazurkami žałudočki. Nu a dalej zastaniecca tolki ačyścić ich ad škarłupinak, zdrabnić u kavamołcy i absmažyć atrymanuju masu na patelni. Zavarvajuć «žałudoŭku» hetak ža, jak i zvyčajnuju kavu. Dla pryhatavańnia adnaho kubačka napoju dastatkova adnoj-dźviuch čajnych łyžak žałudovaha parašku.
Pjecca taki napoj z asałodaj i ciešyć nie tolki straŭnik, ale i serca, bo ŭ im hučyć sama Vosień. Sumnaja, ale nadzvyčaj pryhožaja, jak i čaroŭnyja nakciurny vialikaha Šapena.
