Paleskija babuli vystupiać na «Kamianicy»
16 vieraśnia na fiestyvali «Kamianica» pad Minskam adbudziecca kancert «Aŭtentyčnyja śpievy Paleśsia», dzie prahučać pieśni ŭ vykanańni sapraŭdnych žycharoŭ rehijonu. Hienieralny partnior fiestyvalu — AAT «Bank BiełVEB».
U kancercie «Aŭtentyčnyja śpievy Paleśsia» voźmuć udzieł dva kalektyvy z Bresckaj vobłaści. Duet Jeŭdakii Zinovič i Fiodara Bułyhi pradstavić viosku Vulka Drahičynskaha rajona. U svaju čarhu trya «Čabatuchi» ŭ składzie Nadziei Šyłaviec, Vieniery Pakipič i Antaniny Bobryk pradstavić viosku Stašany Pinskaha rajona.
— Najmaładziejšaj udzielnicy kancerta 63 hady, najstarejšaj — 80. Jany vučylisia śpiavać ad svaich baćkoŭ, dziadoŭ i babul. Jany viedajuć sotni piesień. Asnovu repiertuara składajuć abradavyja pieśni, a taksama prypieŭki, liryčnyja, biasiednyja. Heta vialiki ekskluziŭ, jaki navat u vioskach zaraz možna pačuć vielmi redka, — raspaviadaje Siarhiej Doŭhušaŭ, lidar hurta Vuraj i kiraŭnik prajekta «Śpieŭny schod».
Kancert «Aŭtentyčnyja śpievy Paleśsia» pačniecca ŭ 15.00 u draŭlanaj carkvie. A zaśpiavać biełaruskija narodnyja pieśni razam sa «Śpieŭnym schodam» hledačy zmohuć u 18.00 na hałoŭnaj scenie. Fiestyval budzie prachodzić z 12.00 da 22.00.
Chedłajnierami «Kamianicy-2017» buduć hurty Onuka (Ukraina), Theodor Bastard (Rasija), Shuma (Biełaruś), The Doox (Ukraina). U prahramie taksama vialiki kirmaš z majstar-kłasami ramieśnikaŭ, vystavami mastakoŭ i fatohrafaŭ, dziciačaj placoŭkaj.
Fiestyval adbudziecca na terytoryi Muzieja narodnaj architektury i pobytu (v. Aziarco, 4 km. za aŭtarynkam «Malinaŭka»). Usie hrošy ad kvitkoŭ iduć na rachunki muzieja, dapamahajučy zachoŭvać unikalnuju kalekcyju aŭtentyčnaj biełaruskaj draŭlanaj architektury 18—20 stahodździaŭ, sabranuju ŭ roznych rehijonach krainy.
Papiarednie kvitki kaštujuć da 10 rubloŭ (darosły), u dzień fiestyvalu košt uźnimiecca da 15 rubloŭ (darosły). Papiaredni prodaž ažyćciaŭlajecca ŭ sistemach Bycard.by, Kassy.by, SMSbilet.by. Dla dziaciej daškolnaha ŭzrostu ŭvachod biaspłatny. Dajechać da placoŭki možna na aŭtobusie ad mietro «Malinaŭka» ci na viełasipiedzie. Dla viełasipiedaŭ na terytoryi muzieja budzie arhanizavazavana admysłovaja parkoŭka. Infalinija: (029) 363 76 85, (017) 209 41 63.
