Jak heta pracuje: servis Jandeks.Probki. Repartaž z ofisa «Jandeksa» ŭ Minsku
Siońnia mnohija aŭtamabilisty pierad vyjezdam u horad u hadzinu pik praviarajuć na kartach zahružanaść vulic. Najbolš časta dla hetaha ŭ Biełarusi vykarystoŭvajuć servis «Jandeks.Probki». Nam stała cikava: a jakim čynam Jandeks apieratyŭna daviedvajecca pra zahruzku daroh?
My naviedali minski ofis «Jandeksa» i daviedalisia, jak nasamreč pracuje servis. A zaadno parazmaŭlali pra toje, jakija źviestki pra biełaruskich karystalnikaŭ internetu cikaviać rasijskija śpiecsłužby.
Servis «Jandeks.Probki»
Pra asablivaści pracy servisu nam raspavioŭ rehijanalny mieniedžar «Jandeksa» ŭ Biełarusi Jahor Cyhanok.
Jahor Cyhanok.
«Jandeks.Probki — heta ałharytm, jaki dazvalaje nam analizavać darožnuju situacyju i vizualizavać jaje na našych kartach. Ałharytm zasnavany na karystalnickich dadzienych. Našy karystalniki z ustalavanymi na ich pryłady mabilnymi Jandeks.Kartaj abo Jandeks.Navihataram pierasoŭvajucca pa horadzie, i dadatak aŭtamatyčna adpraŭlaje biahučaje raźmiaščeńnie karystalnika i jaho ŭnikalny identyfikatar na našyja sierviery.
Hetyja dadzienyja biezasabovyja — uvieś abmien źviestkami, jaki adbyvajecca pamiž karystalnikam i nami, adpaviadaje našaj palitycy pryvatnaści. My nie zmožam vyznačyć pa hetych źviestkach, ź jakoj mienavita mašyny ich atrymali», — raspaviadaje spadar Cyhanok.
Faktyčnaja chutkaść ruchu, jakuju kiroŭcy bačać na svaich navihatarach, vyznačajecca z dapamohaj GPS-spadarožnikaŭ, i dla pabudovy karty zatoraŭ jana nie patrebnaja.
Jandeks usio adno pryblizna moža raźličyć, ź jakoj chutkaściu vy ruchajeciesia. Heta adbyvajecca, dziakujučy analizu chutkaści źmianieńnia vašaha raźmiaščeńnia na karcie. I ŭžo paśla analizu pieramiaščeńnia niekalkich aŭtamabilaŭ z pryładami Jandeks.Kartaŭ vyličvajecca siaredniaja chutkaść ruchu na dadzienym učastku darohi.
«Byvajuć takija vypadki, kali čałaviek pryparkavaŭsia, vyjšaŭ na niekalki chvilin u kramu, a navihatar pakinuŭ uklučanym. Kali b sistema paličyła jaho chutkaść jak nulavuju, heta mahło b mocna paŭpłyvać na siaredni pakazčyk. Ale sistema ŭmieje adkidvać takija pamiežnyja vypadki. Kali mašyn šmat, i ŭsie jeduć z narmalnaj chutkaściu, jana dakładna razumieje, što hety vypadak uličvać nie varta.
Tamu vidavočna, što, čym bolš aŭtamabilaŭ na toj ci inšaj darozie karystajucca mapaj i navihataram «Jandeksa», tym bolš dakładnaj vychodzić infarmacyja pra siaredniuju chutkaść ruchu i, adpaviedna, zatory», — kaža Jahor Cyhanok.
Pa atrymanych vynikach analizu roznyja ŭčastki daroh paznačajucca roznymi kolerami: zialonym, žoŭtym, čyrvonym. Hłuchija zatory abaznačajucca čyrvona-karyčnievym, a karyčnievym — pierakrytyja darohi.
«Ale nie zaŭsiody, naprykład, čyrvony koler moža aznačać, što na hetym miescy zator, — papiaredžvaje Jahor. — Moža zdarycca, što pa darozie jedzie mała mašyn, zatoru byccam by niama — ale daroha vuzkaja, ź jamami, tamu mašyny jeduć pavolna. Niekatoryja ŭčastki pobač sa śviatłaforami taksama mohuć afarboŭvacca ŭ čyrvony koler, navat kali ruch nie ŭskładnieny».
«Jandeks» vykarystoŭvaje 10-balnuju sistemu acenki probak, dzie 10 — maksimalnaja zahružanaść daroh.
Umoŭnyja 7 bałaŭ Minska buduć kardynalna adroźnivacca ad 7 bałaŭ Maskvy.
Heta źviazana z roznym usprymańniem darožnaje situacyi karystalnikami ŭ roznych haradach. U Maskvie, naprykład, usie pryvykli da sapraŭdy pavolnaha trafiku: mašyn šmat, ščylnaść ruchu nadta vialikaja i siaredniaja chutkaść dosyć nizkaja. Tamu 10 bałaŭ tam stavicca tolki ŭ tym vypadku, kali ruch namiortva spynieny.
Ci časta zdarajucca 10-balnyja probki ŭ Minsku? «Heta byvaje vielmi redka, — kaža Jahor Cyhanok.
— Zvyčajny maksimum dla Minsku — 8 bałaŭ.
Uvohule dziesiacibalnuju situacyju my nazyvajem «chutčej pieššu», heta značyć, što sapraŭdy chutčej dajści pieššu, čym stajać u probcy. U Minsku takich situacyj nie byvaje, bo navat pry samych vialikich zatorach pierasoŭvacca pieššu atrymlivajecca ŭsio adno pavolniej».
Supracoŭniki sočać za situacyjaj na darohach Minska.
Papiaredžańni pra kamiery nazirańnia
U Jandeks.Karcie i Jandeks.Navihatary jość funkcyja papiaredžańnia pra kamiery videanazirańnia, jakija ŭstalavanyja na darohach pa šlachu ruchu aŭtamabila.
Šmat chto kaža, što papiaredžvać ab kamierach na darohach — heta niesumlenna. Maŭlaŭ, navošta tady ich ustaloŭvajuć? U samoj kampanii nie padzialajuć taki punkt hledžańnia i majuć ułasnuju dumku.
«Kamiery zvyčajna ŭstaloŭvajucca na avaryjna-niebiaśpiečnych učastkach. Adpaviedna, kali našaje papiaredžańnie ab tym, što napieradzie kamiera, prymusić kiroŭcu źnizić chutkaść i być bolš uvažlivym, i, dziakujučy hetamu, nie zdarycca avaryi, to heta aznačaje, što my robim dobruju spravu.
I tut našyja mety supadajuć z metami DAI: hałoŭnaje — heta źnižeńnie avaryjnaści, a nie zbor štrafaŭ», — zapeŭnivaje nas Jahor.
Pra vykarystańnie Jandeksam biełaruskaje movy
Pakolki «Jandeks» — kampanija rasijskaja, jakaja stała transnacyjanalnaj. Vidavočna, što ŭ kožnaj krainie jana maje pracavać na miascovych movach. Na biełaruskuju movu pierakładzienaja pakul tolki hałoŭnaja staronka pošuku i jašče niekalki servisaŭ. Tyja ž Jandeks.Karty biełaruskaj viersii nie majuć, a Jandeks.Navihatar pa-biełarusku nie razmaŭlaje.
Pa słovach sp. Cyhanka, kampanija pravodzić rehularny manitorynh usich krain na patrebu ŭ moŭnaj łakalizacyi:
«Na žal, u Biełarusi patreby ŭ navihatary na biełaruskaj movie pakul nie bačna. Ale, kali jana ŭźniknie, Jandeks abaviazkova prymie adpaviednyja zachady. My hatovyja padładžvacca pad luby rynak».
Kožny pieramoŭny pakoj u minskim ofisie «Jandeksa» maje biełaruskuju nazvu: «U nieskładovaje», «Biełaviežskaja pušča», «Chutka-smačna» i inšyja.
Patreba ŭ moŭnaj łakalizacyi vyznačajecca, u pieršuju čarhu, kolkaściu pošukavych zapytaŭ na toj ci inšaj movie. U Biełarusi dola zapytaŭ u «Jandeks» na biełaruskaj movie składaje kala 2—3%. Ale dakładnuju ličbu vyznačyć ciažka, bo kali niekatoryja słovy, uviedzienyja ŭ radok pošuku, adnolkava pišucca na dźviuch, a časam i na troch movach — biełaruskaj, ukrainskaj, ruskaj — sistemie składana adrazu zrazumieć, jakaja heta mova z troch.
Pra supracoŭnictva sa śpiecsłužbami
Niadaŭna staŭ viadomy dakładny śpis dadzienych karystalnikaŭ sacsietak, sajtaŭ i mesendžaraŭ, jakimi cikavicca FSB Rasii. My zapytalisia ŭ Natalli Žuraŭlovaj, kiraŭnicy pres-słužby Jandeksa ŭ Biełarusi, jak novy rasijski zakon paŭpłyvaje na biełaruskich karystalnikaŭ servisaŭ kampanii.
Natalla Žuraŭlova.
«Na terytoryi ŭsich krain «Jandeks» pracuje ŭ adpaviednaści ź ich zakanadaŭstvam. Nikoli ničyje dadzienyja nie mohuć być pradastaŭlenyja biez adpaviednaha rašeńnia suda, — zapeŭnivaje Natalla. — U «Jandeksie» niama nijakaha śpiecyjalnaha kanała, pa jakim FSB mahło b svabodna prahladać usie dadzienyja karystalnikaŭ i, tym bolš, čytać ich pierapisku. Tak, asobnyja źviestki mohuć być pradastaŭlenyja. Ale heta moža adbycca tolki ŭ tym vypadku, kali my paličym heta arhumientavanym. Byŭ vypadak, kali niejkija dziaržorhany ŭ Rasii paprasili dać peŭnyja dadzienyja adnaho z karystalnikaŭ elektronnaj pošty i navat pryjšli z rašeńniem suda, ale jurysty kampanii paličyli hety zapyt niearhumientavanym i infarmacyju nie vydali. Potym na «Jandeks» padali ŭ sud, i kampanija hety sud vyjhrała».
Miž tym, pa słovach sp. Žuraŭlovaj, varta razumieć, što kali havorka idzie pra karystalnika pošuku, to pra jaho kampanija nie viedaje praktyčna ničoha, akramia taho, jaki zapyt byŭ zadadzieny ź jahonaha kampjutara.
«My navat nie viedajem, ci byŭ heta realny čałaviek, abo ŭsiaho tolki kotka pa kłavijatury prabiehła», — kaža Natalla.
Darečy, łakalnyja ofisy (jakim źjaŭlajecca i ofis u Minsku) nie vałodajuć dadzienymi karystalnikaŭ. Kali ŭłady Biełarusi zachočuć atrymać niejkuju infarmacyju, im pryjdziecca źviarnucca ŭ rasijskaje TAA «Jandeks»
z zachavańniem usich pracedur, praduhledžanych mižnarodnymi normami, a taksama ŭmovami mižnarodnych pahadnieńniaŭ pamiž krainami.
Hetaksama jak dla atrymańnia infarmacyi pra karystalnikaŭ servisaŭ «Huhła» nieabchodna źviartacca ŭ ofis kampanii ŭ Kalifornii, śpiecyjalisty jakoha buduć dziejničać u ramkach zakonaŭ hetaha štata.
