Liviant: Pierachod na apłatu charčavańnia praz ARIP — kašmar dla kłasnych
Napiaredadni novaha navučalnaha hoda stała viadoma, što apłata charčavańnia ŭ škole budzie apłočvacca vyklučna praz ARIP, svaimi razvažańniami nakont taho, u što heta pracedura pieratvorycca dla nastaŭnika, dzielicca viadomy nastaŭnik Jaŭhien Liviant na svajoj staroncy ŭ fejsbuku.
Raspaviadaju ab apłacie charčavańnia ŭ škołach praz ARIP.
«Sprava navat nie ŭ zališniaj nahruzcy dla nastaŭnika. Sprava ŭ prynižeńni samoha nastaŭnika, jakomu davodzicca rabić niepatrebnyja rečy. Kali b heta treba było, inšaje pytańnie. Ale čałavieku rabić niepatrebnuju pracu — heta prynižeńnie, heta žudasnaja nahruzka, heta toje, čaho my dapuścić ni ŭ jakim razie nie možam…» — z vystupu A. Łukašenki na respublikanskaj naradzie dla nastaŭnikaŭ.
Kožny dzień kłasny kiraŭnik pavinien budzie da 16-00, heta značyć padčas urokaŭ, uvajści ŭ sistemu sa svajho akaŭnta, naturalna, skarystaŭšysia asabistym PK i apłačanym za svoj košt internetam.
Uvajšoŭšy ŭ sistemu pad asabistym id, nastaŭnica pavinna budzie pastavić ptušački nasuprać prysutnych u škole vučniaŭ i adznačyć adsutnych (a jašče jość tyja redkija vučni, jakija ŭ škołu chodziać, ale ŭ školnaj stałovaj nie jaduć). Zatym jana pavinna budzie adznačyć, jaki numar kompleksu jakoje dzicia źjeła na śniadanak. A kali chto-niebudź ź dziaciej jašče i abiedaje ŭ škole, to nastaŭnica abaviazanaja adznačyć mieniu dla kožnaha: bulbačka, katleta i h.d. A jašče buduć dzieci, jakija pa niejkich pryčynach (naprykład, pa chvarobie) syduć paśla pary ŭrokaŭ dachaty, i ich treba budzie pieraadznačać.
Raz na tydzień kłasnamu kiraŭniku buduć dasyłać dadzienyja pra niepłacielščykaŭ, ź jakimi joj daviadziecca pravieści pracu.
Tak, zabyŭsia skazać, što sistema heta pastajanna zavisaje, tamu nastaŭniku budzie nie da ŭrokaŭ. Naohuł, nie vielmi zrazumieła, ci raźličana sistema na adnačasovy ŭvod takoj kolkaści infarmacyi. Heta chto-niebudź testavaŭ? Dumaju, što nie.
Darečy, kali ŭ kłasnaha kiraŭnika niama asabistaha PK abo hadžeta z apłačanym internetam, to ŭvodzić dadzienyja jon budzie ź inšymi nastaŭnikami pa čarzie z tych pary kampjutaraŭ u škole, jakija padłučanyja da internetu.
Tak, jašče zabyŭsia skazać, što nie ŭsio nastaŭniki siabrujuć z ARIP (a niekatoryja i naohuł z kampjutaram), tamu im pryjdziecca ciažka, a imaviernaść pamyłak budzie vielmi vialikaja.
Pry hetym nastaŭnik nie budzie atrymlivać hrošy za hetuju pracu, a voś pa hałavie atrymlivać za roznyja «kasiaki» budzie. A pamyłki buduć niepaźbiežna: štodnia ŭnosić dadzienyja pa 30 vučniach — heta praca materyjalna adkaznaha buchhałtara, a nie nastaŭnika, jaki nie navučany hetaj pracy. Značyć, z nastaŭnika jašče i hrošy spatrabujuć, kali niešta pojdzie nie tak.
I darečy, chto budzie ŭsim hetym zajmacca, kali kłasnaha kiraŭnika ŭ hety dzień niama ŭ škole, naprykład, praz chvarobu?
