Times: Lizavieta II nie źbirajecca adrakacca pasadu
Karaleva Vialikabrytanii Lizavieta II nie źbirajecca admaŭlacca ad pasady i pieradavać uładu naślednamu pryncu Čarlzu. Pra heta paviedamiła niadzielnaja hazieta The Sunday Times sa spasyłkaj na blizkija da manarcha krynicy, piša TASS.
Pa ich słovach, karaleva pa-raniejšamu płanuje vykonvać abaviazki manarcha krainy. Jany taksama nahadali, što jašče ŭ pramovie, prymierkavanaj da svajho 21-hodździa, tady jašče spadčynnaja pryncesa Lizavieta publična paklałasia: «Usio majo žyćcio, stanie jano doŭhim abo karotkim, budzie pryśviečana słužeńniu vam [narodu]». Adna z krynic vydańnia taksama zajaviła, što pakul karaleva zdarovaja i zdolnaja vykonvać abaviazki kiraŭnika dziaržavy, lubyja razmovy pra rehienctva nie buduć mieć pad saboj nijakaj hleby.
Raniej hazieta Mail on Sunday zajaviła, što ŭ 2021 hodzie Lizavieta II (u vypadku dasiahnieńnia 95-hadovaha vieku) źbirajecca pieradać paŭnamoctvy manarcha starejšamu synu pryncu Uelskamu Čarlzu na padstavie Aktu ab rehienctvie ad 1937 hoda.
Lizavieta II była karanavanaja ŭ 1952 hodzie ŭ vieku 25 hadoŭ. 6 lutaha Lizavieta II adznačyła 65-hodździe svajho znachodžańnia na pasadzie, staŭšy pieršaj siarod brytanskich manarchaŭ pa praciahłaści kiravańnia. 21 krasavika jana adśviatkavała svoj 91-y dzień naradžeńnia.
