Paŭdniovaja Kareja prosić ZŠA dapamahčy paźbiehnuć vajny z KNDR
Prezident Paŭdniovaj Karei Mun Džein zaklikaŭ ZŠA dapamahčy paźbiehnuć vajny z Paŭnočnaj Karejaj i znajści dypłamatyčnaje rašeńnie kryzisu, piša Bi-bi-si.
Kiraŭnik Abjadnanaha kamiteta načalnikaŭ štaboŭ VS ZŠA hienierał Džozef Danfard zapeŭniŭ, što dypłamatyja zastajecca dla Vašynhtona pryjarytetam, adnak tam rychtujucca i da vajennaha varyjantu raźvićcia padziej - na vypadak, kali sankcyi suprać Pchieńjana nie pryniasuć vynikaŭ.
Paŭnočnaja Kareja ŭ paniadziełak zajaviła, što luby ŭzbrojeny kanflikt u lubym vypadku pieratvorycca ŭ jadziernuju vajnu.
U paniadziełak Kitaj vydaŭ zahad, skiravany na zabaronu impartu šerahu tavaraŭ z KNDR - u adpaviednaści z sankcyjami AAN, ab jakich było abvieščana raniej.
Sankcyi byli ŭviedzienyja ŭ adkaz na niekalki zapuskaŭ balistyčnych rakiet, praviedzienych Paŭnočnaj Karejaj, a taksama ŭzmacnieńnie vajennaj rytoryki z boku Pchieńjana.
U adkaz na apošnija vyprabavańni prezident ZŠA Donald Tramp pryhraziŭ KNDR «ahniom i lutaściu, jakich śviet jašče nie bačyŭ».
Paŭnočnaja Kareja, u svaju čarhu, prystrašyła ZŠA udaram pa vyśpie Huam, dzie znachodzicca amierykanskaja vajskovaja baza.
«Naš hałoŭny pryjarytet - nacyjanalny intares Paŭdniovaj Karei, a naš nacyjanalny intares — heta mir, — skazaŭ u paniadziełak Mun Džein. — Ja ŭpeŭnieny, što ZŠA ŭ dadzienaj situacyi adreahujuć u spakojnaj i adkaznaj maniery, u adpaviednaści z kirunkam našaj palityki».
Jon taksama zhadaŭ, što Karejskaja vajna 1950—53 hadoŭ «zabrała bolš za miljon žyćciaŭ, pieratvaryła harady ŭ ruiny i zamacavała padzieł paŭvostrava».
Paŭdniovakarejski lidar zaklikaŭ KNDR «nieadkładna spynić usie pravakacyi j varožuju rytoryku, zamiest taho, kab i dalej paharšać situacyju».
Hienierał Džozef Danfard padčas vizitu ŭ Sieuł zapeŭniŭ paŭdniovakarejskaje kiraŭnictva ŭ prychilnaści ZŠA dypłamatyi, adnak padkreśliŭ: «Jak vojenačalnik ja pavinien pierakanacca, što ŭ prezidenta jość vajennyja mahčymaści na vypadak, kali dypłamatyčny i ekanamičny cisk pravalicca».
Paśla Sieuła Danfard adpravicca ŭ Kitaj i Japoniju.
Dziaržaŭnaje paŭnočnakarejskaje ahienctva CTAK u paniadziełak paviedamiła, što kanflikt moža ŭspychnuć z-za «drobnaha incydentu».
«Prablema ŭ tym, što, kali nastupić vajna, heta moža vylicca tolki ŭ jadziernuju vajnu, - havorycca ŭ paviedamleńni. - My sočym za kožnaj drobiaźziu ŭ Złučanych Štatach».
U niadzielu dyrektar CRU Majk Pampiea zajaviŭ, što niepasrednaj pahrozy jadziernaj vajny z Paŭnočnaj Karejaj niama.
