Viktoryju Azaranka abvinavacili ŭ «vykradańni» ŭłasnaha syna, jaje čakaje sud
U niepryjemnuju historyju trapiła samaja viadomaja ŭ historyi biełaruskaja tenisistka Viktoryja Azaranka. Źnianacku stała viadoma, što ŭ lipieni jana razyšłasia sa svaim bojfrendam i baćkam jaje syna Bili Makkinham.
Viktoryja Azaranka. Fota eurosport.com
U adnosinach para była ad minułaha hoda. Da hetaha biełaruska doŭhi čas sustrakałasia z repieram Redfu i ŭkrainskim tenisistam Siarhiejem Bubkam-małodšym.
U śniežni ŭ Viktoryi i Bili naradziŭsia syn, jakoha nazvali Lea Alaksandr. Doŭhi čas maładyja pražyli ŭ Biełarusi. «Jamu vielmi padabajecca, chacia spačatku byŭ kulturny šok. Ciapier jon hulaje ŭ chakiej u Biełarusi, jamu vielmi padabajecca Biełaruś. U Amierycy časta dumajuć, što ich kraina adzinaja, i ničoha bolš nie isnuje. Heta dapamahło jamu vyraści. Da Biełarusi jon nikoli ŭ žyćci nie jeŭ sup, ciapier jon prosić maju mamu pryhatavać na abied sup», — raskazvała Viktoryja ŭ mai sioleta.
Ciapier para raspałasia i Bili źviarnuŭsia ŭ sud Bievierli-Chiłs z pazovam ab «skradańni» syna. Sud vyrašyŭ, što Lea Alaksandr bližejšym časam musić być viernuty ŭ ZŠA.
Ciapier mały znachodzicca z baćkam, Viktoryja była abmiežavanaja ŭ pravie spać sa svaim synam. Ale pa vynikach suda, jaki adbyŭsia ŭ sieradu, jana hetaje prava sabie viarnuła.
Izrailskija ŚMI paviedamlajuć, što Viktoryja Azaranka naniała miascovaha advakata Ziva Valniera, kab toj abaraniaŭ intaresy tenisistki ŭ sudzie.
Słuchańni pa pytańni baćkoŭskich pravoŭ projduć u vieraśni.
Paviedamlajecca taksama, što Valnier rychtuje pazoŭ ab naniasieńni Azaranka maralnaha ŭrona. Spartsmienka ŭ suviazi z hetymi padziejami moža prapuścić turnir u amierykanskim Cyncynaci. Suma kampiensacyi moža skłaści 10 miljonaŭ dalaraŭ.
Viktoryi Azaranka 28 hadoŭ, jana była pieršaj rakietkaj śvietu, a taksama vyjhravała Alimpijadu ŭ pary z Maksimam Mirnym.
