ZŠA ŭviali sankcyi suprać brata Uha Čaviesa i siami vieniesuelskich čynoŭnikaŭ
Adan Čaviec. Foto: Claudia Daut / Reuters.
Administracyja prezidenta ZŠA Donalda Trampa ŭviała novyja sankcyi suprać vaśmi vieniesuelskich čynoŭnikaŭ i palitykaŭ, uklučajučy brata eks-prezidenta Uha Čaviesa, sakratara vieniesuelskaj prezidenckaj kamisii pry Ustanoŭčym schodzie, Adana Čaviesa. Pra heta piša RBK sa spasyłkaj na paviedamleńnie Miniusta ZŠA.
Miniust uvioŭ novyja sankcyi za ich rolu ŭ stvareńni Ustanoŭčaha schodu, inicyjavanaha prezidentam Vieniesueły Nikałasam Madura. Aktyvy ŭ ZŠA tych ludziej, što trapili pad sankcyi, buduć zamarožanyja, im taksama budzie zabaronieny ŭjezd u Štaty.
Reuters sa spasyłkaj na amierykanskich čynoŭnikaŭ paviedamlaje, što pakul što naftavyja kampanii Vieniesueły nie patrapili pad sankcyi, ale heta moža adbycca ŭ budučyni.
31 lipienia Minfin ZŠA uvioŭ sankcyi suprać prezidenta Vieniesueły Nikałasa Madura taksama praz vybary va Ustanoŭčy schod. Sakratar kaznačejstva Styvien Mnučyn tady zajaviŭ, što Madura — «dyktatar, jaki ihnaruje volu vieniesuelskaha naroda». Tady jon paviedamiŭ, što luby, chto prymaje ŭdzieł u rabocie schodu moža trapić pad sankcyi.
Ustanoŭčy schod u Vieniesuele sklikajecca ź inicyjatyvy Madura, jaki maje namier źmianić Kanstytucyju i raspuścić parłamient.