Biełarus Siarhiej Palčeŭski źjechaŭ vajavać na Danbas
Minčuk Siarhiej Palčeŭski źjechaŭ na Danbas i dałučyŭsia da ŭkrainskich dobraachvotnickich farmiravańniaŭ. Padrabiaznaści Palčeŭski raspavioŭ u intervju žurnalistcy belsat.eu.
«Ja źjechaŭ va Ukrainu nieŭzabavie paśla taho, jak raskryŭ fakt padpisańnia papiery ab supracy z KDB. Zrazumieŭ, što praciahvać svaju dziejnaść na radzimie ja bolš nie zmahu. Nie daduć. Usio adno znojduć, za što pasadzić. Raniej ja raspaviadaŭ, jak mnie pahražali pryciahnuć da adkaznaści za DTZ, jakoje adbyłosia nibyta pa majoj vinie.
Pra namier pajechać na Danbas Siarhiej nie paviedamiŭ ni siamji, ni paplečnikam pa Maładym froncie. Kankretnuju nazvu dobraachvotnickaha padraździaleńnia i jaho dysłakacyju Palčeŭski taksama pakul nie choča afišavać.
«Peŭny čas ja prosta žyŭ va Ukrainie, a paŭtara tydnia tamu pryjechaŭ na Danbas. Tut usio — adna sucelnaja pieradavaja linija, uvieś čas stralajuć. Navučańnie pačaŭ prachodzić adrazu tut, na Danbasie. Mianie vučać karystacca supraćtankavym hranatamiotam SPH-9».
Navabraniec havoryć pra adjezd na vajnu spakojnym tonam. Hetak ža spakojna jon kłaŭsia pad koły MAZa ŭ lutym hetaha hodu, kali Małady front abaraniaŭ Kurapaty. Palčeŭski ŭpeŭnieny: havorki pra viartańnie ŭ Biełaruś być nie moža, pakul dziejničaje ciapierašniaja ŭłada.
«Ja ŭśviedamlaju, što ŭ Biełaruś darohi niama. Nu dyk ja i nie źbirajusia viartacca, pakul tam Łukašenka. Tym časam tut ja nabiarusia dośviedu, navučusia, jak baranić krainu. Hetyja viedy mohuć spatrebicca mnie ŭ budučyni».
Palčeŭski dapuskaje, što na jaho ŭ Biełarusi mohuć zavieści kryminalnuju spravu. Što tyčycca strachu, to i heta byvaje: «Byvaje strašna, zaŭždy na pieradavoj. Ale vybar užo zrobleny», — kaža Palčeŭski.
30-hadovy Siarhiej Palčeŭski apošni čas zarablaŭ vyrabam mebli.
Padčas abarony Kurapataŭ Siarhiej Palčeŭski na znak pratestu prykavaŭ siabie kajdankami da bampiera hruzavika.
Na chvali sakavickich represij, 22 sakavika, Palčeŭski byŭ zatrymany i źmieščany pad vartu ŭ SIZA KDB pa abvinavačvańni ŭ padrychtoŭcy masavych biesparadkaŭ. U siaredzinie krasavika jon vyjšaŭ na volu i nieŭzabavie pakajaŭsia, što ŭ turmie padpisaŭ papieru ab patajemnaj supracy ź biełaruskaj śpiecsłužbaj.
