Jak u filmach: dapoŭnienuju realnaść možna budzie impłantavać prosta ŭ vočy
Pakul Google dumaje, što dalej rabić sa svaimi akularami Glass, a Microsoft sprabuje źnizić košt nieimavierna darahoj AR-harnitury HoloLens, amierykanskaja aftalmałahičnaja kampanija Omega Ophthalmics raspracavała vielmi cikavuju płatformu, pry dapamozie jakoj u voka možna budzie impłantavać nie tolki roznyja sensary i linzy, ale taksama i składanyja elektronnyja pryłady, zdolnyja intehravać dapoŭnienuju i źmiašanuju realnaść niepasredna ŭ zrok čałavieka.
Toje, jak pracuje padobnaja technałohija, było dobra prademanstravana ŭ papularnym karotkamietražnym filmie Sight («Pohlad») 2012 hoda. Čałaviek nibyta bačyć pierad saboju vialikuju kolkaść dadanaj infarmacyi, moža vykarystoŭvać virtualnuju realnaść dla hulni, hatavańnia ježy, spraŭdžvańnia i pošuku infarmacyi i h.d.
Płatforma ž, raspracavanaja amierykanskaj kampanijaj, atrymała nazvu Omega Gemini Refractive Capsule. Jana ŭjaŭlaje saboj ełastyčny kantejnier, jaki ŭvodzicca pad radužnuju abałonku voka pry dapamozie špryca i raspraŭlajecca tam. Unutry kantejniera Omega Gemini dosyć miesca dla taho, kab vykarystoŭvać jaho dla, naprykład, aŭtamatyzavanaj padačy lekaŭ unutr voka, raźmiaščeńnia bijamietryčnych sensaraŭ abo lubych inšych pryładaŭ. Usie jany, zrazumieła, ŭvodziacca ŭ kantejnier z dapamohaj ihołki. A kab padkarektavać zrok čałavieka, unutr kantejniera prosta ŭpyrskvajuć hnutkuju linzu, jakaja raspraŭlajecca ŭnutry i zajmaje naležnaje joj miesca.
Tym nie mienš nichto nie čakaje, što maładyja ludzi z dobrym zrokam nieadkładna rvanucca impłantavać u svaje vočy roznyja hadžety. U pieršuju čarhu płatforma pryznačajecca dla ludziej z prablemami zroku i inšymi zachvorvańniami. Pažyłyja ludzi napeŭna buduć mieć pierad vačyma vyraznuju kartu maršrutu da kramy abo doma, bo z hadami ŭ mnohich uźnikajuć prablemy z pamiaćciu i aryjentavańniem u prastory. Zrešty, nie vyklučana, što płatforma znojdzie prymianieńnie i ŭ vajennaj śfiery. Ci nie pra heta maryli režysiory ŭ roznych fantastyčnych bajevikach?
Prapanujem vašaj uvazie prezientacyjnaje videa, u jakim padrabiazna raskazvajecca pra novuju technałohiju.
