Praŭnuki Ihnata Damiejki pryjechali ŭ Biełaruś, ich uračysta pryniali ŭ MZS — FOTA
Siońnia, u 215-ju hadavinu z dnia narodzinaŭ Ihnata Damiejki ŭ Ministerstvie zamiežnych spraŭ prezentavali biełaruski pierakład knihi pra Damiejku, jaki padrychtavała jahonaja praŭnučka Pas Damiejka. Na ŭračystaść u Biełaruś pryjechali try praŭnuki i adzin prapraŭnuk Ihnata Damiejki z Čyli, ZŠA i Aŭstralii.
«Heta cudoŭna, ja pra takoje, dumaju, nia maryła nikoli ŭ maim žyćci, — skazała Pas Damiejka. — Ja nikoli nia maryła, što budu tut, na radzimie maich prodkaŭ. Vielmi vielmi dziakuju, Biełaruś. Heta nievierahodnaje ščaście i honar dla majho pradziaduli. Ja viedaju, što jon tut, prysutničaje siarod nas. Vielmi ščaślivy i vielmi ŭschvalavany. I rady, što kniha pra jaho žyćcio pierakładzienaja na movu ziamli, adkul jon pachodzić».
Naščadki Damiejki ŭ Miensku.
Knihu «Ihnat Damiejka: ź Miadźviedki — u Santjaha-de-Čyli» prezentavali ŭ Ministerstvie zamiežnych spraŭ. Ministar zamiežnych spraŭ Uładzimier Makiej padaryŭ pieršy asobnik knihi Pas Damiejcy.
«Dziakujučy takim ludziam, jak Damiejka, byŭ zakładzieny padmurak našaj nacyjanalnaj identyčnaści, stała mahčymym madulavańnie biełaruskaj nacyi ŭ kancy XIX — pačatku XX stahodździa», — skazaŭ Uładzimier Makiej.
Biełaruski varyjant pabačyŭ śviet ź inicyjatyvy Ministerstva zamiežnych spraŭ i pry padtrymcy Ministerstva infarmacyi. Jak patłumačyŭ Svabodzie presavy sakratar MZS Dźmitry Mirončyk, u ministerstvie paŭhodu tamu zadumali vydać biełaruskaje vydańnie memuaraŭ i zaprasić naščadkaŭ Damiejki ŭ Biełaruś. Tady stała viadoma, što nad biełaruskim varyjantam užo vosiem hadoŭ pracuje Valancina Lebiedzieva.
«Kali ŭ nas źjaviłasia infarmacyja, što jość manuskrypt, nad jakim idzie nie adzin hod praca, my dałučylisia, dapamahli z arhanizacyjnymi pytańniami, źviarnulisia ŭ Ministerstva infarmacyi pa padtrymku, — skazaŭ Mirončyk. — Tady, naradziłasia ideja navukovaj kanferencyi, źjaviłasia ideja zaprasić siudy naščadkaŭ Damiejki».
Pas Damiejka sa svajoj knihaj, vydadzienaj pa-biełarusku
U studzieni 2017 hoda Svaboda apublikavała interviju z Pas Damiejkaj. Akurat tady jana raspaviała, što ŭ Biełarusi pierakładajuć jaje knihu, jakaja ŭ aryhinale nazyvajecca «Ihnat Damiejka: žyćcio ŭ emihracyi». Jana vyjšła pa-hišpansku ŭ 2002 hodzie.
Taksama Pas Damiejka kazała, što da jaje nikoli nie źviartalisia biełaruskija dyplamaty.
Ministar infarmacyi Lilija Ananič prysutničała na prezentacyi.
«Da mianie nieadnarazova źviartalisia litoŭskija i polskija dyplamaty, — kazała tady Pas Damiejka. — Ale nichto i nikoli ź biełaruskich dyplamataŭ sa mnoj nie kantaktavaŭsia. Na žal, nijakich aficyjnych stasunkaŭ nie było».
Naščadki Damiejki praviaduć u Biełarusi niekalki dzion. Jany naviedajuć miaściny, źviazanyja sa svaim prodkam.
«Heta naš pieršy raz u Biełarusi, — skazaŭ Mihiel Łuis Zaŭškievič, prapraŭnuk Damiejki, horny inžyner, jaki vyras i žyvie ŭ Čyli. — Ja dumaju, što my vierniemsia».
Da prezentacyi knihi Pas Damiejki ŭ MZS padrychtavali vystavu, pryśviečanuju Ihnatu Damiejku.