Marynu Bystruju nie spynić: Abmierkavańnie Słučakam pierapiski z «Hranitam» u internecie — niezakonna i nieetyčna
Internet-supolnaść nie pieršy miesiac naziraje za palemikaj staršyni rady FK «Hranit» Maryny Bystraj i jurysta Ihara Słučaka. Choć amal kožny list spadaryni Bystraj zakančvajecca tłustaj kropkaj «liču našu pierapisku spynienaj», uśled štoraz prychodzić čarhovaja papiera.
Ihar Słučak.
Na hety raz Maryna Bystraja kaža Iharu Słučaku pra niezakonnaść usiaho taho, što jon robić. Maŭlaŭ, uvohule Ihar nie maje nijakaha prava źviartacca ŭ «Hranit», bo heta supraćzakonna.
Nahadajem, što ŭ svaim liście Ihar prasiŭ staršyniu rady «Hranita» pradublavać jamu dadzieny raniej adkaz pa-biełarusku.
«Vysłać adkaz ad 23.08.2016 № 421/08-16 na biełaruskaj movie nie ŭjaŭlajecca mahčymym u vyhladzie adsutnaści takoha dakumienta ŭ arhanizacyi.
Taksama źviartaju vašu ŭvahu na toje, što pastupiŭšy ad vas 07.07.2017 hoda list nie adpaviadaje patrabavańniam dziejučaha zakanadaŭstva Biełarusi ab zvarotach.
Akcentuju vašu ŭvahu na toje, što hramadskaje abjadnańnie «Futbolny kłub «Hranit — Mikaševičy» nie źjaŭlajecca dziaržaŭnym orhanam, inšaj arhanizacyjaj, u jakuju vy majecie prava źviartacca ŭ adpaviednaści z patrabavańniami zakanadaŭstva ab zvarotach.
A raźmiaščeńnie vami i abmierkavańnie ŭ internecie pierapiski z hramadskim abjadnańniem, listoŭ rajonnych vykanaŭčych kamitetaŭ i harvykankamaŭ, sudovych pastanoŭ i pozvaŭ źjaŭlajecca niezakonnym, a z pazicyi normaŭ marali — nieetyčnym i niekarektnym.
Naohuł, liču, što vy złoŭžyvajecie pravam, a vašy dziejańni ažyćciaŭlajucca vyklučna z namieram nanieści škodu inšaj asobie.
Liču pierapisku na hetym spynienaj», — piša ŭ aficyjnym adkazie za podpisam i ź piačatkaj Maryna Bystraja (na fota nižej).
Treba skazać, što Maryna Bystraja — były juryst pradpryjemstva «Hranit». Ale ŭjaŭleńni pra prava ŭ spadaryni Bystraj i spadara Słučaka zusim roznyja.
«Hety adkaz absalutna niepiśmienny ź jurydyčnaha punktu hledžańnia. Čałaviek kaža, što ŭ arhanizacyi niama lista, pierakład jakoha ja prašu. Choć u instrukcyi pa spravavodstvie, zaćvierdžanaj Ministerstvam justycyi, havorycca, što kopii zvarotaŭ musiać zachoŭvacca ŭ arhanizacyi piać hadoŭ. Heta ŭžo padstava dla raźbiralnictva, — kaža Ihar Słučak.
Z tym, što jaho list, dasłany spadaryni Bystraj, nie adpaviadaje zakanadaŭstvu, Ihar taksama nie zhodny. Tym bolš, dla Słučaka heta nie pieršy zvarot: jon ich sotniami dasyłaje ŭžo šmat hadoŭ.
«Zakanadaŭstva ab zvarotach Maryna Bystraja traktuje absalutna niapravilna, pakolki jano raspaŭsiudžvajecca na ŭsie arhanizacyi, u tym liku i na indyvidualnych pradprymalnikaŭ, — kaža Ihar. — Nu a zajava pra toje, što raźmiaščeńnie listoŭ źjaŭlajecca niezakonnym — heta ŭvohule drymučaść. Nielha publikavać tolki toje, što znachodzicca pad padpiskaj ab nierazhałošvańni, albo toje, što źjaŭlajecca dziaržaŭnaj tajamnicaj. Usio inšaje, što trapiła da vas zakonnym šlacham, vy možacie svabodna raspaŭsiudžvać.
I nakont taho, što heta, maŭlaŭ, nieetyčna. Samoj hańbić ludziej [Spadarynia Bystraja, naprykład, u svaich listach nazyvaje Słučaka drennym jurystam z uzroŭniem raźvićcia dziciačy sad-jasielnaja hrupa — NN] — maralna i etyčna. A źviartać na heta ŭvahu, jak pisaŭ Krapiva: «Dziadziečka, tvoj łyč u brudzie!» — dyk heta ŭžo nie maralna i nie etyčna».
Ihar nie razumieje, čamu spadarynia Bystraja dahetul zajmaje pasadu staršyni rady «Hranita».
«Heta ŭžo nie pieršy prakoł Bystraj u pracy, ale jana ŭsio jašče zajmaje kirujučuju pasadu i praciahvaje hańbić kłub i jaho sponsaraŭ. Mnie cikava, niaŭžo na Bieraściejščynie niama kampietentnaha śpiecyjalista, jaki b moh zamianić Bystruju na hetaj pasadzie? Ja zajmajusia spravavodstvam ad 2009 hoda, i takaja situacyja ŭ mianie ŭpieršyniu», — kaža Ihar Słučak.
Epapieja z «Hranitam» pačałasia jašče letaś. Na Marynu Bystruju raniej užo składali pratakoł za admovu adkazvać pa-biełarusku, a niadaŭna skłali jašče dva — za adkaz nie pa temie zvarotu.
Ihar źviartaje ŭvahu, što za admovu adkazać pa-biełarusku spadaryniu Bystruju tak i nie pryciahnuli da adkaznaści, choć i byŭ składzieny pratakoł.
«Sprava była spynienaja praz toje, što vyjšli terminy. Samaje cikavaje, što sud razhladaŭ spravu na nastupny dzień paśla taho, jak terminy vyjšli», — dadaje Słučak.
«Zdarałasia, pa 20 pahroz na dzień ad rasijan prychodziła» — hutarka z kultavym abaroncam movy Iharam Słučakam
