Arche prapanuje knihu, jakaja raźvienčvaje savieckuju «patryjatyčnuju» mifałohiju
22 červienia 1941 hodu niamieckija vojski napali na SSSR. Zhodna z savieckaju histaryjahrafijaj, pačałasia Vialikaja Ajčynnaja vajna. Adnoj ź pieršych na siabie pryniała ŭdar Bieraściejskaja krepaść.
Kniha «Briest. Leto 1941 h. Dokumienty. Matieriały. Fotohrafii» pierakanaŭča raźvienčvaje savieckuju j postsavieckuju «patryjatyčnuju» mitalohiju, źviazanuju z abaronaju Bieraściejskaje krepaści ŭ červieni 1941 hodu.
U joj arhumentavana śćviardžajecca, što aktyŭnaja faza bajoŭ doŭžyłasia nia bolš za tydzień (a nia miesiac, jak nastojvała savieckaja prapahanda), što ź pieršaha dnia bajavych sutyčak adbyvałasia masavaja zdača ŭ pałon sałdat i aficeraŭ Čyrvonaje armii dy, bolš za toje, pieravažnaja bolšaść savieckich abaroncaŭ Bieraściejskaje krepaści trapiła ŭ niamiecki pałon, što lik savieckich pałonnych vymiaraŭsia sotniami j tysiačami, i što naahuł zvyškancentracyja savieckich vajskoŭcaŭ na maleńkaj terytoryi Bieraściejskaje krepaści była stratehičnaju pamyłkaju savieckaha kamandavańnia.
Razam z tym, za zdabyćcio krepaści niemcam daviałosia zapłacić vialikuju canu — adnych zabitych było kala 450 čałaviek.
Vydańnie taksama raskazvaje pra pieršyja miesiacy štodzionnaha žyćcia haradžanaŭ pad niamieckaj akupacyjaj. Hetaja naracyja ilustrujecca ŭnikalnymi fotamatarjałami — niamieckimi prapahandysckimi plakatami, fatazdymkami mirnaha nasielnictva j haradzkich landšaftaŭ horadu Bieraścia leta 1941 hodu.
Kniha ŭpieršyniu ŭvodzić u navukovy zvarot šyroki spektar krynic, robić dastupnymi dakumenty j matarjały najbolš važnyja dla razumieńnia padziejaŭ pačatkovaha peryjadu vajny.
Publikacyja vyjšła na rasiejskaj movie. Usie tekstavyja krynicy pryvodziacca na movie aryhinału j u pierakładzie na rasiejskuju movu. Jany zhrupavanyja ŭ try rubryki — «Bajavyja dziejańni», «Sytuacyja ŭ horadzie» j «Pačatak teroru».
Nazvanaje vydańnie — heta plon bolš čym piacihadovaje pracy aŭtarskaha kalektyvu, składzienaha ź niamieckich i biełaruskich navukoŭcaŭ — Kryścijana Hancera, Iryny Jalenskaj, Aleny Paškovič, Jaŭhiena Razienbłata j Siarhieja Strunca.
Kniha vyjšła ŭ ćviordaj vokładcy na vysokim palihrafičnym roŭni, u joj źmiaścili sotni ŭnikalnych fatazdymkaŭ Bieraścia j Bieraściejskaje krepaści ŭ červieni—lipieni 1941 h., ź ich bolš za 60 u kolery. Vydańnie maje 724 staronki.
Da 9 lipienia hetuju knižku možna atrymać pa mienšaj canie. Bolej daviedacca pra jaje źmiest i ŭmovy atrymańnia možna na sajcie Arche.
