Kremy ad zaharu niebiaśpiečnyja pry kantakcie z vadoj z basiejnaŭ
Chimiki ŭ svaim daśledavańni pakazali, na jakija škodnyja chimičnyja złučeńni raspadajecca kampanient mnohich soncaachoŭnych kremaŭ — avabienzon — pry ŭzajemadziejańni z chłaravanaj vadoj i ultrafijaletavym vypramieńvańniem. Navukoŭcy apisali vyniki svajoj pracy ŭ časopisie Chemosphere.
Ilustracyjnaje fota.
Kremy ad zaharu, u skład jakich uvachodzić avabienzon, vykarystoŭvajuć miljony ludziej va ŭsim śviecie. Chimičnyja UF-filtry, da jakich naležyć avabienzon, pahłynajuć ultrafijalet dziakujučy asablivaściam svajoj struktury. Avabienzon adsarbuje ultrafijaletavaje vypramieńvańnie i pieraŭtvaraje jaho ŭ chvali inšaj daŭžyni, jakija nie škodziać skury.
Samo pa sabie hetaje rečyva biaśpiečnaje, adnak navukoŭcam ŭdałosia pakazać, što ŭ vodnym rastvory jano zdolnaje raspadacca na škodnyja chimičnyja złučeńni.
Ekśpierymienty zmadelavali realnuju situacyju, kali soncaachoŭny krem na skury ludziej kantaktuje z vadoj u basiejnach. Razłažeńnie avabienzonu moža adbyvacca prosta na mokraj skury čałavieka, namazanaha kremam.
Chimiki vyśvietlili, što ŭ vadzie kampanient soncaachoŭnaha kremu raspadajecca z utvareńniem dvuch dziasiatkaŭ arhaničnych złučeńniaŭ, jakija naležać da kłasaŭ aramatyčnych kisłot i aldehidaŭ, fienołaŭ i acetafienonaŭ.
Najbolš taksičnymi praduktami akazalisia fienoły i chłaravanyja acetafienony. Darečy, apošnija, u pryvatnaści, chłoracetafienon, uvachodziać u skład ślezaciečnych sumiesiaŭ, jakija vykarystoŭvaje palicyja dla razhonu mitynhaŭ.
Ciapier navukoŭcy daśledujuć transfarmacyju avabienzonu va ŭmovach chłaravańnia i bramavańnia presnaje i marskoje vady. Pry chłaravańni abo bramavańni marskoje vady asartymient praduktaŭ raspadu avabienzonu budzie jašče šyrejšy, a, kali ŭ vadzie jość soli miedzi (u mnohich basiejnach ich dadajuć dla pryhožaha błakitnaha koleru), to ŭ vialikich kolkaściach utvorycca bromaform, jaki moža niehatyŭna adbivacca na piečani i nyrkach, a taksama na niervovaj sistemie.
