U RPC nazvali ananimnaść u internecie «deficytam adkaznaści»
Namieśnik staršyni sinadalnaha adździeła Ruskaj pravasłaŭnaj carkvy pa suviaziach z hramadskaściu i ŚMI Vachtanh Kipšydze zajaviŭ, što ananimnaść u internecie čaściej za ŭsio aznačaje «deficyt adkaznaści», paviedamlaje VVS.
«Ananimnaść, jak i lubaja inšaja źjava, kali davodzicca da absurdu, niasie niebiaśpieku. U peŭnych vypadkach čałaviek maje prava na tajamnicu svajho žyćcia, naprykład, pry zdačy analizaŭ na VIČ. Adnak ananimnaść, na žal, čaściej za ŭsio stanovicca sinonimam biezadkaznaści», — ličyć jon.
«Ananimnaść vykarystoŭvajuć u tym liku dla taho, kab nie nieści adkaznaść za svaju dziejnaść: za abrazu inšych ludziej, za arhanizacyju złačynnych supolnaściaŭ, dla skłanieńnia dziaciej da samahubstva», — dadaŭ Kipšydze.
Jon taksama prakamientavaŭ inicyjatyvu Raskamnahlada pa błakavańni miesiendžara Telegram, skazaŭšy, što «ŭłada maje prava razhladać zakonnyja miery, nakiravanyja na baraćbu z ekstremizmam i teraryzmam, u pryvatnaści i ŭ miesiendžarach».
Takim čynam Kipšydze prakamientavaŭ zajavu, zroblenuju pravasłaŭnym publicystam i internet-prapaviednikam ijeramanacham Makaryjem na kruhłym stale «Svaboda sumleńnia, chryścijanskaja antrapałohija i raźvićcio novych infarmacyjnych technałohij».
Ijeramanach Makaryj zajaviŭ, što ananimnaść u internecie nielha razhladać jak prava čałavieka. «Ananimnaść — heta nie prava asoby, a prava satany, jaki źniščaje asobu», — zajaviŭ ijeramanach Makaryj.
Pavodle jaho słoŭ, dziakujučy ananimnaści ŭ internecie adbyvajucca «djabalskija dyviersii», jakim možna supraćstajać, vypracavaŭšy «imunitet i intalerantnaść» da škodnasnych mierkavańniaŭ, jakija raspaŭsiudžvajucca ŭ internecie.
Raniej patryjarch Kirył zajaviŭ, što internet vyklikaje niehatyŭnaje staŭleńnie da Ruskaj pravasłaŭnaj carkvy ŭ maładoha pakaleńnia.
«Adbyvajecca heta, viadoma, nie na roŭnym miescy, adbyvajecca heta pad upłyvam mocnaha i varožaha ŭ adnosinach da carkvy infarmacyjnaha patoku, jaki raspaŭsiudžvajecca praz sacyjalnyja sietki», — skazaŭ patryjarch.
14 červienia Dziaržduma RF pryniała ŭ pieršym čytańni zakonaprajekt ab ananimnaści ŭ miesiendžaraz. Zakonaprajekt prapanuje abaviazać miesiendžary pradastaŭlać svaje pasłuhi tolki identyfikavanym pa abanienckim numary karystalnikam.
Pry hetym prapanujecca nadzialić Raskamnahlad pravam abmiažoŭvać rassyłku paviedamleńniaŭ ź infarmacyjaj, jakaja raspaŭsiudžvajecca z parušeńniem zakona. Takoj infarmacyjaj mohuć być, naprykład, paviedamleńni ab niesankcyjanavanych mitynhach.