«Abyjakavy da mody, nie pje, nie kuryć»: Cyhankoŭ stvaryŭ zborny vobraz pakaleńnia tych, kamu ciapier 18
Voś davajcie ja apišu niejki zborny vobraz čałavieka, a vy skažacie, kolki jamu hadoŭ.
Lubić kłasičny rok, mała ŭsprymaje papsu i ŭvohule sučasnuju muzyku. Nie lubić sacyjalnyja sietki, karystajecca imi vyklučna ŭ vypadku nieabchodnaści. Abyjakavy da madelaŭ techničnych hadžetaŭ — telefonaŭ, smartfonaŭ — jany pavinny vykonvać peŭnuju funkcyju, a nie być modnymi. Abyjakavy da mody ŭ adzieńni, i navat z peŭnaj pahardaj stavicca da tych, chto za hetaj modaj sočyć. Prychilnik zdarovaha ładu žyćcia, nie kuryć, nie pje.
Kali ja niekalki razoŭ apisvaŭ ludziam taki partret i pytaŭsia, kolki hadoŭ hetamu čałavieku — to atrymlivaŭ adkaz — 40-50 hadoŭ.
Ale hetamu «zbornamu» čałavieku 18. I heta nie partret majho syna, kali što, — ale zborka peŭnych rysaŭ jahonaha asiarodździa.
Pamiataju, kali razmaŭlaŭ z Ryhoram Baradulinym — było adčuvańnie, što my ravieśniki. Ad taho, što ŭ jaho zaŭsiody było šmat enierhii i intaresu da maich moładzievych temaŭ. A niekatoryja maje ravieśniki, jakija ŭzdychajuć pra minułaje i nastalhujuć pra SSSR, padajucca mnie dziadulami. Tak i maładyja — čytaješ niekatoryja posty, i razumieješ, što čytaješ dziciačyja dopisy. Chočacca pahładzić pa hałoŭcy, ale strymlivaje, što aŭtaru 30 hadoŭ. A ź inšym 25-hadovym razmaŭlaješ jak sa svaim ravieśnikam — jon i viedaje šmat, i razumieje.
Dumaju, i mnohich z vas było takoje ŭražańnie, kali babula bližej za adnakłaśnic albo kali ź siabrami dziaciej cikaviej, čym z ravieśnikami. Prosta pakaleńni dzielacca nie pa viertykali, a pa haryzantali — i ideałahična, i skažam tak, enierhietyčna.