Pieršy biełaruski hrafičny raman vyjšaŭ da dnia narodzinaŭ Bykava
Sajuz biełaruskich piśmieńnikaŭ admysłova da dnia narodzinaŭ Vasila Bykava vypuściŭ apaviadańnie Vasila Bykava «Svajaki», zroblenaje ŭ žanry hrafičnaha ramana maładym mastakom Janam Žvirblem. Kniha pabačyła śviet u vydaviectvie «Knihazbor».
Žanr hrafičnaha ramanu daŭno staŭ papularnym u Jeŭropie i ZŠA. Hetaja raznavidnaść šyroka viadomych komiksaŭ pretenduje na admysłovaje stanovišča ŭ śviecie mastactva. Hrafičnyja ramany ilustrujuć surjoznyja litaraturnyja tvory i ŭ adroźnieńnie ad komiksaŭ majuć pavialičany abjom i najčaściej vydajucca ŭ palepšanym, bahatym afarmleńni. Vychodziać i aŭtarskija hrafičnyja ramany, jakija razhladajucca jak paŭnavartasnyja litaraturnyja tvory. Tak, u 1992 hodzie hrafičny raman Arta Špihielmana «Maŭs» pra chałakost atrymaŭ najprestyžniejšuju Pulitcaraŭskuju premiju.
U Biełarusi komiksy tak i nie zajmieli tryvałaj nišy, chacia na pačatku 1990-ch, kali vydavalisia pamiatnyja «Dzikaje palavańnie karala Stacha» i «Dzie žyvuć bursoniki», na hetyja knižki byŭ šalony popyt. Apaviadańnie «Svajaki» ŭ azdableńni Jana Žvirbli robić fanatam komiksaŭ i amataram avanhardnaj knižnaj hrafiki sapraŭdny padarunak. Žorstki tvor Vasila Bykava pra toje, jak maci, paspadziavaŭšysia na svajactva ź viaskovym palicajem, nieŭpryciam adpraŭlaje dvaich synoŭ na śmierć, prailustravany hetak ža biaźlitasna vostra. Ekspresiŭnyja, naturalistyčnyja i poŭnyja trahizmu malunki mastaka nahadvajuć, što heta zusim nie prościeńki komiks dla daškolnikaŭ, a paŭnavartasny hrafičny raman.
Zusim niadoraha knihu možna kupić u nastupnych kniharniach Minska: «Akademkniha», «Centralnaja», «Śvietač», «Viedy», «Kniharnia piśmieńnika», «Łohvinaŭ», «Knihi i knižački». Darečy, usie vydańni «Knihazbora» možna zamović u samim vydaviectvie biez handlovaj nadbaŭki.
