Lidaru «Niejra Dziubiela» — 45! TOP-10 małaviadomych faktaŭ pra Alaksandra Kulinkoviča
18 maja Alaksandru Kulinkoviču, vakalistu i lidaru biełaruskaha pank-hurta «Niejra Dziubiel», spoŭniłasia 45 hadoŭ. «Naša Niva» zrabiła padborku cikavych faktaŭ pra viadomaha muzyku.
Santechnik-žurnalist
Kulinkovič skončyŭ prafiesijna-techničnuju vučelniu, pa śpiecyjalnaści jon — santechnik. Paśla budučy muzyka jašče trochi pavučyŭsia na žurnalista ŭ BDU, ale «nie zrasłosia».
A zarablaje na žyćcio Kulinkovič nie muzykaj, a žurnalistykaj. Jon pisaŭ u roznyja vydańni, u tym liku i «Sovietskuju Biełoruśsiju», byŭ veb-redaktaram.
Darečy, jaho žonka Alena taksama pracuje ŭ miedyja, jana redaktar rekłamna-infarmacyjnaha časopisa «TAXI».
Zajmaŭsia seksam u redakcyi haziety «Praŭda»
Pra niezvyčajny fakt raspaviadaŭ sam Kulinkovič u intervju «Kamsamołcy»:
«Ja zajmaŭsia kachańniem u redakcyi haziety «Praŭda», kali mianie pakinuli tam načavać, zahadaŭšy ničoha nie čapać».
«Zabić asiecina»
Viadomaja nazva «Niejra Dziubiel» źjaviłasia ŭ kalektyva nie adrazu. Pieršaj idejaj było nazvać hurt «Muzyčnaje abjadnańnie «Zabić asiecina». Pryčym, ideja naležała jakraz Alaksandru Kulinkoviču. Praŭda, jaho ŭsio ž adhavaryli ad takoj nazvy.
Śpiavaŭ z Ksiušaj Sitnik
U 2010 hodzie Kulinkovič niečakana zaśpiavaŭ razam ź pieramožcaj dziciačaha «Jeŭrabačańnia» Ksienijaj Sitnik. Razam jany vykanali pieśniu «My vmiestie», ź jakoj Ksienija pieramahła ŭ konkursie ŭ 2005 h.
Vystup adbyŭsia na hała-kancercie adboračnaha konkursu na dziciačaje «Jeŭrabačańnie», jaho pakazvali pa BT.
Kraina mary — Narviehija
U šmatlikich intervju Kulinkovič nieadnarazova kazaŭ, što nienavidzić Minsk, i, kab nie praca, daŭno źjechaŭ by ŭ viosku. Dy i ŭvohule, muzyka adznačaŭ, što ŭ biełaruskim žyćci nadta šmat niedarečnaściaŭ.
A idealnaj krainaj Alaksandr ličyć Narviehiju. U jaho doma navat visić narviežski ściah na ścianie.
U DNR - bandyty
Kulinkovič pracavaŭ u dziaržaŭnaj haziecie «Sovietskaja Biełoruśsija», adnak nie saromiejecca vykazvacca na vostryja temy. Naprykład, u adnym ź intervju jon rezka prajšoŭsia pa sieparatystach Danbasa:
«Lidary DNR i ŁNR — mnie zdajecca, što heta prosta bandyty, jakija dzielać kavałak ziamli. Jak u 90-ja hady bandyckija hrupoŭki dzialili śfiery ŭpłyvu, tak, mnie zdajecca, i ciapier hetyja ludzi dzielać śfiery ŭpłyvu. Tolki siońnia jany abraśli hierbami i himnami. Mnie zdajecca, jany elemientarnyja bandyty, i pastupać ź imi treba jak z bandytami».
Da hieorhijeŭskaj stužki muzyka stavicca «vielmi niehatyŭna»:
«Mnie kažuć, što heta znak, što hetaja stužka była na ordenach Słavy. Nu tak. Ale razumiejecie, svastycy, jakaja siońnia zabaroniena praktyčna va ŭsich krainach śvietu, šmat tysiač hadoŭ.
Tamu siońnia, kali baču hieorhijeŭskuju stužačku, u mianie staŭleńnie da jaje jak da niehatyŭnaha znaku. A da ludziej, jakija jaje vyviešvajuć, staŭleńnie jak da ludziej, jakija padtrymlivajuć adkryta fašysckuju ahresiju Rasii suprać Ukrainy».
Pačaŭ pisać pieśni na biełaruskaj dziakujučy Karatkieviču
«Byŭ supolnik na vieršy Karatkieviča, pieśnia «Skrypka dryhvy». Choć albom nie vyjšaŭ, ale trybjut mieŭ svoj plon, bo dziakujučy jamu ja pačaŭ śpiavać pa-biełarusku, — raskazvaŭ Kulinkovič. — U pieśni ž jak? Abo ty śpiavaješ na movie, na jakoj dumaješ, abo pieśni vyjduć miortvyja.
Dyk choć ja rasijskamoŭny, ale nastolki prasiaknuŭsia paezijaj Karatkieviča, što paprasiŭ u Volskaha jašče kolki biełaruskich knih pačytać. I tak zachapiŭsia, što kali-nikali pačaŭ dumać pa-biełarusku. I palacieła, nie spynić-nie strymać: pačaŭ składać i hulacca słovami…»
Ledź nie pamior na apieracyjnym stale
U 1994 h. Alaksandru rabili surjoznuju apieracyju — u jaho znajšli anieŭryzmu mazžačka. Usio pačałosia ź nievynosnych hałaŭnych bolaŭ, a paśla vyśvietliłasia, što treba terminova kłaścisia pad nož.
«Mnie vielmi pašancavała: apieracyju rabiŭ najlepšy niejrachirurh Arnold Fiodaravič Śmiejanovič. Najvialikšy čałaviek, hłyba. Ja zhadvaju Arnolda Fiodaraviča va ŭsich svaich malitvach. Kali b apieracyju zrabili na niekalki siekund paźniej, jana skončyłasia b śmiarotnym zychodam, vynikam raskazvaŭ Kulinkovič «Kamsamolskaj praŭdzie».
— Kali ŭskryli čerap i chirurh zanosiŭ skalpiel, kab vydalić puchlinu, stała vidać, što jana razarvałasia, da žyćciova važnych sasudaŭ pabieh strumieńčyk kryvi. I kali b dabieh, nastupiła b imhniennaja śmierć. Arnold Fiodaravič paśpieŭ pierakryć dostup i vyratavaŭ mianie. Z taho času ŭ kancy listapada ja adznačaju druhi dzień naradžeńnia».
Insult na scenie
Praz 20 hadoŭ paśla toj apieracyi Kulinkoviča napatkała novaja biada sa zdaroŭjem.
U krasaviku 2015 hoda naviedniki kancerta «Niejra Dziubiela» aburalisia pavodzinami vakalista — Kulinkovič błytaŭ i zabyvaŭ słovy, ledź chadziŭ pa scenie. Usie vyrašyli, što muzyka byŭ pjany, ale jak vyśvietliłasia paźniej, u Alaksandra zdaryŭsia mikrainsult. Pa słovach Alaksandra, pierad prezientacyjaj alboma jon nie spaŭ niekalki dzion i vielmi pieražyvaŭ z-za novaj kružełki hurta, da taho ž trochi vypiŭ pierad vystupam.
Zaŭzieŭ za «Čykaha Bułs»
Kulinkovič pryznavaŭsia, što nie nadta cikavicca sportam — ź biełaruskich kamandaŭ uvohule viedaje tolki BATE i staličnaje «Dynama». U apošnim kłubie, darečy, u jaho hulaŭ brat.
Ale peŭnyja simpatyi Kulinkovič usio ž maje. Jon pryznavaŭsia, što «tapiŭ» za viadomy baskietbolny kłub «Čykaha Bułs», navat hladzieŭ usie hulni čempijanatu NBA z udziełam hetaj kamandy. A na čempijanacie Jeŭropy pa futbole (u 2010 hodzie) ŭ finale padtrymlivaŭ hałandcaŭ i byŭ vielmi rasčaravany hulnioj, bo vyjhrała Ispanija.
