SK zavioŭ kryminalnuju spravu ŭ dačynieńni da eks-milicyjanta z Hrodna i čakaje jaho vydačy z Polščy
Śledčy kamitet pačaŭ kryminalnuju spravu ŭ dačynieńni da byłoha milicyjanta, jaki sprabuje paźbiehnuć ekstradycyi z Polščy ŭ Biełaruś.
Dźmitryj Koŭš (sprava), fota belsat.eu
Śledčym kamitetam rasśledujecca kryminalnaja sprava ŭ dačynieńni da Dźmitryja Kaŭša, žychara Hrodna. Jaho dziejańni kvalifikavanyja pa č. 1, 2 art. 430 (atrymańnie chabaru, paŭtorna), č. 1 art. 14 č. 2 art. 430 (zamach na atrymańnie chabaru) Kryminalnaha kodeksa Biełarusi.
«Śledstvam ustanoŭlena, što abvinavačvany, pracujučy na pasadzie opierupaŭnavažanaha pa ekanamičnych złačynstvach UUS Hrodzienskaha abłvykankama, na praciahu doŭhaha času sistematyčna atrymlivaŭ niezakonnyja hrašovyja ŭznaharody. U materyjałach kryminalnaj spravy majucca źviestki pra nie mienš čym 10 faktaŭ atrymańnia i zamachu na atrymańnie chabaru ŭ pieryjad z 2011 pa 2013 hady», — raspaviali ŭ SK.
Pa viersii śledstva, hrošy jon atrymlivaŭ u jakaści padziaki «za niesupraciŭleńnie supraćpraŭnaj dziejnaści, jakaja vyjaŭlajecca ŭ ažyćciaŭleńni niezakonnych valutnych apieracyj fizičnaj asobaj na adnoj z aŭtadaroh u pamiežnaj zonie Biełarusi».
U kryminalnaj spravie taksama majucca źviestki ab prodažy abvinavačanym słužbovaj infarmacyi ab mierapryjemstvach, jakija pravodziacca dziaržaŭnymi i pravaachoŭnymi orhanami ŭ metach vyjaŭleńnia i spynieńnia pravaparušeńniaŭ i złačynstvaŭ.
Dźmitryj Koŭš znachodzicca ŭ mižnarodnym vyšuku. Chavajecca na terytoryi Polščy. U ciapierašni čas, na padstavie dakumientaŭ, pradstaŭlenych biełaruskimi śledčymi, kampietentnymi orhanami justycyi Polščy razhladajecca pytańnie ab jaho vydačy dla pryciahnieńnia da kryminalnaj adkaznaści za ŭčynienyja złačynstvy na terytoryi Biełarusi.
