«Amkador» mianiaje ekanamičny viektar z rasijskaha na kitajski
Eksperty miarkujuć, što Kitaj pieratvarajecca ŭ najvažniejšaha stratehičnaha i ekanamičnaha partnera Biełarusi, vyciaśniajučy sa zvykłych pazycyj Rasieju.
Čarhovym prykładam układańnia kitajskich investycyjaŭ — padpisanaja ŭ časie forumu «Adzin pojas, adzin šlach» u Pekinie damova ab finansavaj dapamozie na madernizacyju pradpryjemstvaŭ chołdynhu «Amkador». U pryvatnaści, pahadnieńniem praduhledžvajecca vydzialeńnie 350 miljonaŭ dalaraŭ na raźvićcio zavodu spectechniki «Amkadormaš» u Kałodziščach pad Mienskam i jaho strukturnych padraździaleńniaŭ «SALEO» ŭ Homli i Kobryni.
«Amkador» — adzin z najbujniejšych eŭrapiejskich vytvorcaŭ darožna-budaŭničaj, kamunalnaj, sielskahaspadarčaj, lasnoj, aeradromnaj, śniehaprybiralnaj dy inšaj spectechniki. Štohod abjadnańnie vypuskaje bolš za 5 tysiač mašyn z madelnaha šerahu, jaki pieravaliŭ za sotniu. Kiruje chołdynham adzin z samych bahatych ludziej Biełarusi Alaksandar Šakucin.
Asnoŭnym vonkavym rynkam zbytu tradycyjna źjaŭlajecca Rasieja. Kiraŭnictva pradpryjemstva nieadnarazova vychodziła z prapanovami da rasiejskich partneraŭ ab stvareńni sumiesnaj vytvorčaści, što dazvoliła b naraścić abjomy prysutnaści ŭ susiedniaj dziaržavie. Adnak labisckija pazycyi tamtejšych čynoŭnikaŭ nie dazvolili realizavać ambitnyja zadumy. Biełaruskaja prysutnaść na ŭschodzie z hodu ŭ hod źmianšajecca. U vyniku vakantnaje miesca namahajecca zaniać Kitaj.
Na pačatku 1990-ch la vytokaŭ stvareńnia «Amkadoru» stajaŭ Vasil Šłyndzikaŭ, praciahły čas jon byŭ hieneralnym dyrektaram pradpryjemstva. Čamu, na jaho dumku, supraca z Rasiejaj faktyčna pravaliłasia?
«Sprava ŭ tym, što Rasiei ŭ hetaj halinie praktyčna niama čaho prapanavać. Aproč, mahčyma, hrošaj. Ale chto siońnia daść hrošy? Pramysłovaść, asabliva mašynabudavańnie, tam praktyčna zahinuła. Siońnia «Amkador» vyrablaje techniki stolki ž, kolki ŭsie zavody kolišniaha Ministerstva budaŭničaj i darožna-kamunalnaj haspadarki SSSR. To bok, tam usio źnikła, atrymać niejkaje noŭ-chaŭ dla raźvićcia niemahčyma ŭ pryncypie. U svoj čas «Amkador» u Rasiei stvaryŭ až dva sumiesnyja pradpryjemstvy — heta było jašče pry mnie. Ale rasiejskija ŭłady ich zabrali, nacyjanalizavali. Paśla hetaha była sproba arhanizavać vytvorčuju placoŭku ŭ Bransku, ale abjomy prosta śmiechatvornyja. Na žal, Rasieja — kraina, dzie zakony nie pracujuć, jak i ŭ nas. Tamu raźličvać na niejki pośpiech absalutna marna».
A ci dapamohuć «Amkadoru» kitajskija investycyi? Pa-pieršaje, umovy vydzialeńnia kredytu nie vydajucca, pa-druhoje, ahučanaja suma dosyć vialikaja, jaje niejkim čynam daviadziecca viartać, kaža Vasil Šłyndzikaŭ:
«Kali ŭsio atrymajecca tak, jak deklarujecca — dobra. Inšaja sprava, sapraŭdy, jak, chto i čym pazyku budzie viartać? Suma surjoznaja. Kali naftachimija raspłacicca jašče maje šancy, to ŭ mašynabudavańni sytuacyja nie takaja aptymistyčnaja. Rynak techniki ŭpaŭ — i ŭ nas, i ŭ Rasiei. Vializnuju kankurencyju składajuć tyja ž kitajskija mašyny, jakija prasoŭvajucca i na rasiejski rynak, i na amerykanski, i ŭ Eŭraźviaz. Prahnazavać, što budzie praź niekalki hadoŭ, nadzvyčaj składana. Jak z majho hledzišča, prajekt cikavy, ale i dosyć ryzykoŭny. Choć, kali ŭzialisia, značyć, na niešta raźličvajuć. Da taho ž hetyja hrošy jašče treba atrymać, pakul havorka tolki pra papiarednija damoŭlenaści. Nu a kali buduć, to prynamsi zasvojać, a jak viartać — pra heta ŭ takich sytuacyjach mała chto dumaje».
Paviedamlajecca, što padčas pracy forumu «Adzin pojas, adzin šlach» byli padpisanyja sumiesnyja z kitajskim bokam damovy ŭ sfery naftachimičnaj apracoŭki, ab układańni ŭ pradpryjemstvy małočnaj haliny, ab biazvypłatnaj subsydyi na budaŭnictva sacyjalnaha žylla, ab kantejnernych pieravozkach z udziełam Biełaruskaj čyhunki, ab budaŭnictvie Śvietłahorskaha CKK siłami kitajskaha padradčyka, ab moładzievym inavacyjnym prajekcie ŭ ramkach industryjalnaha parku «Vialiki kamień» dy inšyja.
