Sprava Šaramieta: da zabojstva mohuć być datyčnyja śpiecsłužby Rasii ci inšych krain SND
Namieśnik ministra ŭnutranych spraŭ Ukrainy Vadzim Trajan, jakoha padazravali ŭ sačeńni za žurnalistam Paŭłam Šaramietam napiaredadni jahonaha zabojstva, zajaŭlaje, što da hetaha złačynstva mohuć być datyčnyja jak specyjalnyja słužby Rasiei, hetak i inšych krain SND.
«U nas adna z klučavych versijaŭ i bolšaść dovadaŭ ukazvajuć na toje, što jość źniešni śled. Tady śledztva adnaznačna budzie pryviazvać jahonuju prafesijnuju dziejnaść, bo jon byŭ u apazycyi i da rasiejskaha prezydenta, i taksama da biełaruskaha prezydenta», — skazaŭ Vadzim Trajan u efiry ŭkrainskaha telekanału «24».
Namieśnik ministra ŭnutranych spraŭ Ukrainy dadaŭ, što ŭ śledztva jość jak minimum dźvie versii adnosna dačynieńnia da zabojstva źniešnich sił.
«Mohuć być datyčnyja słužby inšych sumiežnych dziaržaŭ. Jak minimum, Rasiei i jašče klučavyja inšyja krainy SND, jakija mahli vykanaŭcaŭ taksama praz svaje dziaržaŭnyja terytoryi nakiroŭvać siudy va Ŭkrainu», — adznačyŭ jon.
Na pytańnie viadučaj Soni Koškinaj, jakija mienavita krainy majucca na ŭvazie — Kazachstan ci Biełaruś, Vadzim Trajan pacisnuŭ plačyma.
Namieśnik ministra ŭnutranych spraŭ Ukrainy nazvaŭ jakasnym niezaležnaje žurnalisckaje raśledavańnie, prezentavanaje 10 traŭnia prajektam «Ślidstvo.Info» supolna z pradstaŭnikami mižnarodnaj sietki OCCRP.
«Ja nie dumaju, što heta pieraškodziła śledztvu. Ja viedaju, što kiraŭnictva Nacyjanalnaj palicyi sustrakałasia z žurnalistami i ŭ ich jość razumieńnie, jak razam dalej pracavać», — dadaŭ Vadzim Trajan.
U toj ža čas pradstaŭnik MUS padkreśliŭ, što śledztva maje bolš raspracovak, čym u žurnalisckim raśśledavańni.
«Uścimienka sam da ich pryjechaŭ, adkazvaŭ na telefonnyja zvanki, mašyna była aficyjna zarehistravanaja… Uścimienka jość tym čałaviekam, jaki, razumiejučy, što kali b jon sačyŭ za tym, što adbyłosia, to jak minimum, pryjechaŭ by ź pierabitymi numarami. Ciapier palicyja adpracoŭvaje pa Ŭścimienku, i ja miarkuju, što najbližejšym časam daduć adkaz žurnalistam», — paviedamiŭ Vadzim Trajan.
