«Antyimpieryjalistyčny i antyfašyscki ruch pracoŭnych Biełarusi» raskidvaje ŭ Minsku ŭlotki sa Stalinym. Chto hetyja ludzi?
Čytač dasłaŭ u Redakcyju «Našaj Nivy» ŭlotku, jakuju znajšoŭ u svajoj paštovaj skryni napiaredadni 9 maja.
«Siona-amierykanski kapitalizm», «suśvietny impieryjalizm», «nacyjanalistyčnyja padonki, jakija marać pra fašysckuju dyktaturu ŭ Biełarusi»: jakich tolki pahrozaŭ biełaruskaj dziaržaŭnaści nie było abaznačana ŭ tym listočku. Usio heta zamacoŭvałasia vyjavaj Stalina na reviersie.
Kantakty raspaŭsiudnikaŭ byli ŭkazanyja tam ža — heta «arhkamitet pa stvareńni antyimpieryjalistyčnaha i antyfašysckaha ruchu pracoŭnych Biełarusi».
«Naša Niva» pasprabavała razabracca, što ž heta za ruch i kim kirujecca.
Usio stała jasna paśla razmovy z sakratarom hetaha ruchu — Leanidam Školnikavym, jaki pradstaviŭsia jašče i jak kaardynatar ruchu «Za sajuz i kamunistyčnuju partyju sajuza» (SKPS), razam z hetym — kamunist i člen Kamunistyčnaj partyi Savieckaha Sajuza.
Leanid skazaŭ, što inicyjatyva stvareńnia «antyimpieryjalistyčnaha i antyfašysckaha ruchu» naležyć jamu i paplečnikam — aktyvistam SKPS i padobnych arhanizacyj, jakimi kirujuć ludzi hłybokaha piensijnaha vieku.
«Antyfašyscki front stvarajem tamu, što iduć sproby praniknieńnia fašysckich mietadaŭ i arhanizacyj u Biełaruś. Uspomnim: niadaŭna našyja hranicy šturmavali biełarusy, jakija prajšli praktyku ŭ ATA va Ukrainie. Jany jechali, kab zrabić tuju ž samuju fašysckuju dzieju, jaki zładziŭ hłabalny kapitał va Ukrainie. Biełaruś taksama uvachodzić u suśvietnuju supolnaść i pa roznych kanałach da nas pranikajuć niehatyŭnyja momanty suśvietnaj palityki. A tam hałoŭnaje što? Suśvietny aliharchat imkniecca da niepadzielnaha suśvietnaha ŭładarstva. My nie budziem zapluščvać vočy na heta i ŭ paradku prafiłaktyki arhanizujem antyfašyscki kamitet. Zmahacca budziem dazvolenymi zakonami srodkami», — zajaviŭ Školnikaŭ i padzialiŭsia svaim bolem za radzimu.
«My zaniepakojenyja losam Biełarusi. Kaniečnie, aficyjna zarehistravanych fašysckich arhanizacyj my nie bačym. Ale isnujuć padpolnyja arhanizacii fašysckaha kštałtu, niadaŭnija akcyi — heta ich rabota [havorka, u pryvatnaści, pra 25 sakavika]. Siońniašnija aktyvisty vyklikajuć sumnieŭ. Skažam, anarchisty. U ich śpiecyfičny śvietapohlad, imi možna manipulavać, jak chočaš — u tym liku i ŭ fašysckich intaresach. A demakraty? Kali čałaviek za demakratyju, heta jašče nie značyć, što ŭ jaho niama fašysckich namieraŭ. «Treba hladzieć», jak kazaŭ naš kumir — naturalny i abjektyŭny — Lenin. Chiba ŭ nas demakratyi siońnia nie źjaŭlajucca pravadnikami fašyzma? Chiba amierykanskaja demakratyja — nie źjaŭlajecca fašysckaj? Adnaznačna źjaŭlajecca! Fašyzm u źniešniaj palitycy abaviazkova pieraŭtvorycca ŭ fašyzm va ŭnutranaj. Toj ža Hitler — heta staŭleńnik manapolij, suśvietnaj aliharchii. My taksama za adradžeńnie SSSR. Sapraŭdny Saviecki Sajuz byŭ dabrom dla ŭsich narodaŭ, a pieradusim — dla naroda Biełaruśsii. Saviecki Sajuz pakazaŭ, što moža paśpiachova stajać suprać impieryjalizmu. A kali biełaruski narod ažyćciaŭlaje svaju abaronu pa-za Savieckim Sajuzam, padviarhajecca hienacydu. Albo jak minimum ryzykuje stać dziaržavaj-rabom u suśvietnaha kapitalizmu. My staim za intaresy biełaruskaha naroda!», — zapeŭniŭ Leanid i zamacavaŭ ich prykładami susiedziaŭ.
Aktyvisty SKPS na 9 maja 2017 u Minsku
«Prybałtyka pajšła da Jeŭrapiejskaha Sajuza. I dzie ich suvierenitet? Prafukali! Dzie ekanomika? Prafukali! Iduć pa śviecie z praciahnutaj rukoj! Na chaleru nam takoje? I ŭ Polščy ja nie raz byŭ. Viedaju, što tam robicca. Polšča zhubiła svoj suvierenitet! Jany iduć u farvatary amierykanskaha impieryjalizmu. Narod tam žyvie nie tak dobra, jak pra heta pišuć. I šmat u čym horš, čym u nas. U ich upaŭ dabrabyt u suviazi z sankcyjami, jakija ŭvioŭ Jeŭrasajuz suprać Rasii. A biespracoŭje vaźmicie? U ich jano bolšaje. My taksama padtrymlivajem i DNR, i ŁNR — my prychilniki samavyznačeńnia nacyj! I tam nasielnictva arhanizavała refierendumy. Takija refierendumy, dzie kamar nosu nie zatočyć, usio było arhanizavana tak, što nichto i nie asprečvaje ich vynikaŭ, praviedzienyja jany ŭ vyklučna demakratyčnych umovach. A što zrabili my ŭ Minsku? Praviali pieramovy i vyrašyli, što hetyja terytoryi z asablivym statusam! A što takoje toj asablivy status? Narod nie choča žyć pad fašysckim režymam, my hetaje pamknieńnie padtrymlivajem».
Leanid Školnikaŭ taksama skazaŭ, što ich ruch maje ryčahi ŭpłyvu na ludziej.
«U nas jość sajt [praź mizernuju naviedvalnaść nie indeksujecca analityčnymi sajtami — NN], jość haziety — «Za SSSR» (vydajecca ŭ Maskvie), «Hałosnać» — orhan CK KPSS. Vy, napeŭna, nie padazrajecie, što KPSS žyvaja i dziejničaje? Jość haziety «Pracoŭnaja Rasija», «Ciumienskaja praŭda» i hetak dalej. Dastatkova haziet u nas. Vydajecca hazieta «Napierad», hazieta «Viernaść» — chaj moładź čytaje, hazieta davoli infarmatyŭnaja. Tak, u nas moładź jość. Jaje mienš, čym u BNF, my razumiejem hetuju situacyju, ale moładź u nas jość», — padsumavaŭ Školnikaŭ i zapeŭniŭ, što tolki ŭ jaho arhanizacyi, jakaja maje stać častkaj «antyfašysckaha ruchu», — 700 čałaviek. Tamu jany buduć damahacca rehistracyi ad uładaŭ.
Darečy, kali my spytali, što rabić ź mižnarodnymi kampanijami, jakija pracujuć u Biełarusi, u pryvatnaści — u IT-śfiery, surazmoŭca nas nie zrazumieŭ i skazaŭ, što vystupaje za kantrol interneta u metach supraćdziejańnia chakieram i revalucyjanieram.
