Dziaržsakratar ZŠA nazvaŭ niemahčymaj pierazahruzku adnosin z Rasijaj
U intervju teleprahramie «Meet the Press» na telekanale NBC, Reks Tylersan padkreśliŭ, što administracyja Donalda Trampa nie maje namieru pačynać vybudoŭvać adnosiny z Rasijaj «z čystaha lista».
«Ja dumaju, što terminy nakštałt «pierazahruzka adnosin» vykarystoŭvajucca zanadta časta. Pierazahruzka niemahčymaja, bo niemahčyma ścierci minułaje i pačać usio z čystaha lista. My startujem z taho miesca, na jakim znachodzimsia ciapier», - skazaŭ dziaržsakratar.
Tylersan pryznaŭ, što ŭ ciapierašni čas adnosiny pamiž Vašynhtonam i Maskvoj znachodziacca na «samym nizkim uzroŭni» z momantu zakančeńnia chałodnaj vajny. «Heta niezdarovaja situacyja jak dla ŭsiaho śvietu, tak i dla nas. Nie ŭ intaresach amierykanskaha naroda i našych nacyjanalnych intaresaŭ, kab adnosiny z Rasijaj zastavalisia na takim uzroŭni. Ci atrymajecca ich palepšyć ci ŭsio zastaniecca pa-raniejšamu, pakaža budučynia », - padkreśliŭ jon.
Amierykanski dziaržsakratar taksama paviedamiŭ, što ŭ Rasii i ZŠA jość šyrokaje koła pytańniaŭ, jakija jany pavinny abmierkavać. «Vidavočna, što adno ź ich — umiašańnie Maskvy ŭ prezidenckija vybary. Jano paćviardžajecca dakumientami i absalutna prazrysta», — skazaŭ jon.
