Mocnyja abvinavačvańni hučać u asiarodku «Chartyi-97»
Praciahvajecca ŭnutrany kanflikt u asiarodku «Chartyi-97» — sajta i blizkich da jaho hramadskich struktur.
Uładzimier Kobiec i Natalla Radzina byli paplečnikami, a ciapier kanfliktujuć.
Natalla Radzina vystupiła z rezkimi abvinavačvańniami na adras Uładzimiera Kobieca — byłoha kiraŭnika štaba Andreja Sańnikava na vybarach 2010 hoda, a raniej — stvaralnika ruchu «Zubr».
«Vymušana skazać, što jon złoŭžyvaŭ ałkaholem, apošni hod praktyčna pierastaŭ źjaŭlacca na pracy, prychodziŭ na adnu-dźvie hadziny. Zajaŭki i spravazdačy byli vielmi nizkaj jakaści, davodziłasia za jaho mnohaje pierarablać. Pierastaŭ šukać novych partnioraŭ i novyja krynicy finansavańnia dla sajta, što jašče pahoršyła ciažkaje finansavaje stanovišča sajta, — napisała Radzina ŭ intervju ŭłasnamu sajtu. — I apošniaj kroplaj stała toje, što polskija partniory paviedamili mnie, što Kobiec i niejkaja hramadzianka Łarysa Karalenka adkryli niaŭradavuju arhanizacyju Prospect i kamiercyjnuju firmu Prospect Plus u Polščy i stali źviartacca da tradycyjnych donaraŭ sajta Chartyi-97 z prośbaj dapamohi svaim asabistym strukturam», — piša Radzina.
U svaju čarhu, były pres-sakratar Sańnikava Alaksandr Atroščankaŭ napisaŭ rezki post u fejsbuku na adras Radzinaj. Na dumku Atroščankava, «Chartyja» «skaciłasia ŭ pamyjnicu». «Paśla taho, jak ja ŭbačyŭ maralny bok hetych ludziej, ich palityčnaja i arhanizacyjnaja prynaležnaść mianie nie cikaviać», — piša Atroščankaŭ. Jon vinavacić Radzinu i Bandarenku ŭ intryhach, prydzirkach i chamstvie.
Da rezkaj krytyki Radzinaj dałučyŭsia i inšy były kiraŭnik «Chartyi» Mikałaj Chalezin: «Uładzimir Kobiec nie staŭ pieršym, z kim rasstałasia «Chartyja», zakidaŭšy naprykancy brudam. Nie stanu zaraz pieraličvać dziasiatki žurnalistaŭ, jakija sprabavali pačać pracavać u redakcyi «Chartyi», i mieniedžaraŭ, jakija sychodzili adzin za adnym, nie spracavaŭšysia z kiraŭnictvam struktury. Sam ja pierastaŭ kantaktavać sa svaimi byłymi siabrami i kalehami praktyčna adrazu paśla vychadu z turmy Dźmitryja Bandarenki i Andreja Sańnikava. Pryčyna była prostaja — nievynosna było čuć abvinavačvańni nie tolki ŭ adras tych, z kim supracoŭničaŭ na praciahu mnohich hadoŭ, ale zatym užo i na adras usich — da prykładu, žurnalisckaha korpusa niezaležnych ŚMI, ahułam abvinavačanych «Chartyjaj» u supracy z KDB», — piša Chalezin.
I Radzina, i Kobiec, i Atroščankaŭ, i Sańnikaŭ, i Bandarenka byli palitviaźniami paśla 2010 hoda. Kobiec u 2011-m pryznaŭsia, što jaho zmusili padpisać papieru pra sakretnaje supracoŭnictva z KDB. Paśla 2011 hoda ŭsie jany emihravali, i ciapier žyvuć u Polščy.
Sajt «Chartyja-97» — adzin z samych čytanych u Biełarusi. Jon rezka krytyčny da režymu Alaksandra Łukašenki i zaklikaje da akcyj pratestu.
Kanflikt Radzinaj z Kobiecam uźnik za prava karystańnia niekalkimi pakojami ŭ «Biełaruskim domie» — budynku, addadzienym dla karystańnia biełaruskim emihrantam u Varšavie.