Interpał spyniŭ vyšuk eks-prezidenta Ukrainy Viktara Janukoviča
Interpał vydaliŭ paviedamleńnie ab vyšuku eks-prezidenta Ukrainy Viktara Janukoviča i jaho syna Alaksandra. Pra heta paviedamiŭ pres-sakratar Janukoviča Juryj Kirasir, spasyłajučysia na infarmacyju advakackaj kampanii Joseph Hage Aaronson LLP, jakaja pradstaŭlaje intaresy byłoha ŭkrainskaha prezidenta, piša Tut.by.
Reuters
«Interpał paćvierdziŭ, što na eks-prezidenta Viktara Janukoviča nie raspaŭsiudžvajucca čyrvonaje apaviaščeńnie Interpała abo śpiecyjalny zapyt ab aryšcie i što ich danyja adsutničajuć u bazie Interpała», — paviedamiŭ pres-sakratar na svajoj staroncy ŭ fejsbuku. Tym samym, pavodle jaho słoŭ, Interpał paćvierdziŭ toj fakt, što kryminalnyja pieraśledy ŭ dačynieńni da Janukoviča majuć «palityčna matyvavany charaktar».
«Akramia taho, Interpał pryniaŭ rašeńnie vydalić sa svajoj bazy danych usiu infarmacyju pra Alaksandra Janukoviča, jaki raniej nie abviaščaŭsia ŭ vyšuk», — dadaŭ pres-sakratar.
Infarmacyju ab spynieńni Interpałam vyšuku Janukoviča i jaho syna paćviardžaje i Ukrainskaje nacyjanalnaje biuro Interpała.
Nahadajem, eks-prezidenta Ukrainy Viktara Janukoviča abvinavačvajuć u dziaržaŭnaj zdradzie, u dapamozie pry naŭmysnych dziejańniach, učynienych z metaj źmieny miežaŭ terytoryi i dziaržaŭnaj miažy Ukrainy, a taksama ŭ dapamahańni viadzieńni ahresiŭnaj vajny.
Viktar Janukovič fihuruje ŭ niekalkich kryminalnych spravach va Ukrainie. Siarod ich sprava ab prymianieńni zališnich siłavych mietadaŭ, śpiecsrodkaŭ i ahniastrelnaj zbroi ŭ dačynieńni da ŭdzielnikaŭ masavych akcyj pratestu na Majdanie ź listapada 2013 hoda pa luty 2014 hoda.
Akramia taho, eks-prezident prachodzić jak padazravany pa «spravie Miežyhorja» i «spravie «Ukrtelekama»» (ab niezakonnym zavałodańni 220 miljonami hryŭniaŭ ź dziaržbiudžetu, pryznačanymi dla sistemy uradavaj suviazi).
