Mitrapalit Kandrusievič aburyŭsia «aŭtazakami» na carkoŭnych mierapryjemstvach
Fota Radyjo Svaboda
Kiraŭnik biełaruskaha Katalickaha kaścioła, mitrapalit Tadevuš Kandrusievič vystupiŭ z dakładam u Akademii kiravańnia pry prezidencie, u jakim jon zakranuŭ niekalki prablem suisnavańnia Kaścioła i dziaržaŭnaj ułady.
U svaim dakładzie mitrapalit Kandrusievič zakranuŭ prablemu achovy carkoŭnych mierapryjemstvaŭ.
«Biaśpieka hramadzian, našych viernikaŭ, padčas śviatočnych masavych nabaženstvaŭ važnaja dla ŭsich, jak Kaścioła, tak i dziaržavy. Adnak situacyja, jakaja ŭźnikła sioleta padčas śviatkavańnia Vialikadnia ŭ Minsku, zusim nie spryjała nastroju hałoŭnaha chryścijanskaha śviata.
Pieršaje, što pabačyła śviatočnaja Paschalnaja pracesija, vychodziačy z katedralnaha kaścioła, heta śpiecaŭtamabil la jaho ŭvachodu — tak zvany «aŭtazak».
«Vidavočnaja prysutnaść hetych śpiecaŭtamabilaŭ na dalejšym šlachu pracesii stvarała nastroj napružanaści, niedavieru da naroda, jaki mirna prasłaŭlaŭ ŭvaskrosłaha Chrysta.
Dziaržava i Kaścioł pavinny navučycca sumiesna i prafiesijna vypracoŭvać taki płan dziejańniaŭ padčas arhanizacyi vialikich kaściolnych mierapryjemstvaŭ, jaki budzie spryjać relihijnamu śviatkavańniu, a nie ŭskładniać abo navat pieraškadžać u jaho praviadzieńni», — miarkuje carkoŭny ijerarch.
Nierazumieńnie Tadevuša Kandrusieviča vyklikała i patrabavańnie niekatorych adździełaŭ ideałohii pradstaŭlać prahramu navučańnia Katechizisu ŭ niadzielnych škołach i śpisy dziaciej, jakija ich naviedvajuć.
«Heta ni što inšaje, jak umiašańnie va ŭnutranyja spravy Kaścioła i nieadpaviednaść zakonu ab svabodzie sumleńnia i relihijnych arhanizacyj, — miarkuje mitrapalit. — Jakaja meta takich patrabavańniaŭ? Pravieryć pravaviernaść navučańnia dziaciej? Dazvolcie spytać: «A sudździ chto?» Chto z supracoŭnikaŭ ideałahičnych adździełaŭ skončyŭ katalicki, pravasłaŭny, judejski, musulmanski ci pratestancki ŭniviersitet?»
«Kanfierencyja Katalickich Biskupaŭ u Biełarusi padrychtavała adpaviednyja padručniki, jakija my vykarystoŭvajem dla katechizacyi dziaciej. Jany aficyjna zaćvierdžanyja kaściolnaj uładaj i vydadzienyja. Nichto ničoha nie chavaje i nikoha nie vučyć patajemna».
«Heta nie adzinaja prablema ŭ adnosinach ź miascovymi orhanami ŭłady. Časta ŭ roznych rajonach staviacca roznyja patrabavańni da pradstaŭleńnia infarmacyi ab dziejnaści relihijnych arhanizacyj», — miarkuje jon.
Tadevuš Kandrusievič taksama vykazaŭ zakłapočanaść tym, što biaźvizavy režym nie zakranaje śviataroŭ.
«Ale niemahčyma zahadzia viedać pra ŭsich śviataroŭ, jakija zachočuć naviedać Biełaruś jak turysty. Taki śviatar prychodzić u kaścioł i prosić dazvoł u probašča celebravać śviatuju Imšu. Što pavinien rabić probašč? Pavodle zakonu — admović.
Składvajecca paradaksalnaja situacyja, kali zamiežny śviatar moža prysutničać na Imšy jak viernik, ale, kali stanie pa inšy bok ałtara i ŭznačalić liturhiju, adnačasova jon stanovicca parušalnikam zakonu. U jakim ža śviatle zamiežny śviatar budzie raspaviadać pra Biełaruś za miažoj?
Kali my chočam, kab za nami zamacavaŭsia pazityŭny imidž, hetu normu treba jak maha chutčej admianić, bo jana nie adpaviadaje patrabavańniam času. Ja nie viedaju nivodnaj krainy ŭ śviecie, dzie isnuje padobnaja norma, kali zamiežny śviatar pavinien prasić dazvoł va ŭłady na celebracyju śviatoj Imšy.
Choć za apošnija 25 hadoŭ kolkaść biełaruskich śviataroŭ pavialičyłasia značna — z 60 da amal 400, tym nie mienš nam jašče patrebna dapamoha śviataroŭ z-za miažy. Heta dapamoha patrebna i Pravasłaŭnaj Carkvie, a taksama inšym vieravyznańniam.
U toj ža čas uzhadnieńni na pracu śviataroŭ z-za miažy dajucca nie zaŭsiody, a kali dajucca, to apošnim časam najčaściej tolki na šeść miesiacaŭ abo navat na try.
Heta nie spryjaje narmalnaj pracy śviatara, a adpaviedna i dušpastyrstvu, duchoŭnaj farmacyi ludziej, a asabliva moładzi, z usimi nastupstvami, jakija adsiul vynikajuć.
My kłapocimsia pra miascovyja paklikańni, ale heta patrabuje času. Demahrafičny kryzis, adnak, taksama niehatyŭna ŭpłyvaje na kolkaść paklikańniaŭ. Heta možna paraŭnać z adukacyjaj u VNU. Niezdarma dziaržavaj było ahučana rašeńnie, što na piedahahičnyja śpiecyjalnaści buduć prymać biez ekzamienaŭ. Ci chto moh by ŭjavić sabie takuju situacyju jašče dziesiać hadoŭ tamu? Napeŭna, nie. A siońnia heta rečaisnaść.
Pa nieviadomaj pryčynie Biełaruś čamuści baicca zamiežnych śviataroŭ. Ale kolki kaściołaŭ ŭžo pabudavana i budujecca dziakujučy im! Kolki pastyrskich i dabračynnych prahram ažyćciavili i dalej ažyćciaŭlajuć hetyja śviatary!
«Horka za krainu»: mitrapalit Kandrusievič zaklikaŭ cyvilizavana vyrašyć prablemy dekreta №3
Mitrapalit Kandrusievič u zajavie z nahody padziej 25—26 sakavika zaklikaŭ da ŭzajemnaha prymireńnia
Tadevuš Kandrusievič vystupiŭ u abaronu Kurapataŭ
