Pamior režysior «Maŭčańnia jahniat» Džonatan Demie
U ZŠA na 74-m hodzie žyćcia pamior režysior Džonatan Demie, viadomy pierš za ŭsio jak režysior filma «Maŭčańnie jahniat», jaki vyjšaŭ na ekrany ŭ 1991 hodzie, piša VVS.
Fota: Kevin Winter
Pra śmierć Demie paviedamiŭ časopis Variety. Paźniej ahient režysiora paćvierdziŭ jaho śmierć. Pa jaho słovach, Demie pamior ad uskładnieńniaŭ raku stravavoda ŭ svajoj kvatery na Manchetenie.
Pachavańnie Demie projdzie u kole siamji, skazaŭ jaho ahient.
Film Demie «Maŭčańnie jahniat» zastaŭsia jaho samaj viadomaj pracaj. Heta byŭ adzin ź niešmatlikich filmaŭ u historyi Halivuda, jaki atrymaŭ premii «Oskar» adrazu ŭ piaci naminacyjach — «Najlepšy film», «Najlepšaja režysiorskaja praca», najlepšyja pracy akciora i aktrysy ŭ hałoŭnych rolach i najlepšaja adaptacyja knihi.
Siarod inšych viadomych rabot Demie — film «Fiładelfija». Jon byŭ adnoj ź pieršych karcin, pryśviečanych prablemie ŚNIDu ŭ Halivudzie. Taksama režysior źniaŭ filmy «Zamužam za mafijaj», «Dzikaja štučka», «Mańčžurski kandydat».
Akramia taho, Demie pracavaŭ režysioram na samych viadomych amierykanskich telešou — «Šou Opry Uinfry» i Saturday Night Live, jakija pakłali pačatak cełym žanram televizijnych prahram.
Taksama Demie zdymaŭ klipy dla hurtu New Order i Brusa Sprynhścina.
