U «Zonie Ch» vyjšaŭ repartaž pra biełaruskamoŭnyja kursy dla prahramistaŭ. Arhanizatary kažuć, što heta paklop
20 krasavika ŭ pieradačy «Zona Ch» na telekanale «Biełaruś-1» vyjšaŭ siužet, pryśviečany dziejnaści Instytuta matematyki i kibiernetyki. «Apieratyŭniki prykryli dziejnaść VNU, jakaja pracavała nielehalna».
Havorka ŭ im viałasia pra toje, što niekalki ludziej arhanizavali ŭ Minsku filijał Rovienskaha Mižnarodnaha ekanamična-humanitarnaha univiersiteta imia Ściapana Dziemjančuka (Ukraina). Maŭlaŭ, ustanova nie prajšła licenzavańnia ŭ Biełarusi, a supracoŭniki nie spłačvali padatki.
Asabliva adznačajecca toje, što navučańnie viałosia całkam pa-biełarusku.
Adzin z kiraŭnikoŭ Instytuta matematyki i kibiernetyki Pavieł Buka padzialiŭsia z «Našaj Nivaj» svajoj pazicyjaj pa hetym pytańni. «Infarmacyja padadzienaja chłuślivaja. Havorka pra mižnarodnuju adukacyjnuju prahramu «Infarmatyka», jakaja sapraŭdy ładzicca sumiesna z univiersitetam Dziemjančuka. Ale navučańnie pravodzicca va Ukrainie, choć i dla biełarusaŭ i pa-biełarusku».
Pavieł Buka kaža, što adukacyjny praces u Biełarusi nie vioŭsia zusim. U Minsku byli arhanizavanyja tolki publičnyja biaspłatnyja lekcyi, na jakija byli pryciahnutyja vykładčyki viadučych univiersitetaŭ krainy. «Adukacyja była zavočna-dystancyjnaj na terytoryi inšaj krainy, jana nijak nie padpadaje pad jurysdykcyju biełaruskaj milicyi».
Taksama Pavieł Buka aburajecca tym, što Mižnarodny ekanamična-humanitarny ŭniviersitet imia Ściapana Dziemjančuka pakazany ledźvie nie jak «šaraškina kantora». «Tamtejšaja adukacyja adpaviadaje patrabavańniam Bałonskaha pracesu».
Razam z tym, jon kaža, što dziejnaść prahramy nie prypynienaja i publičnyja lekcyi praciahvajucca. «Užo bolš za miesiac praciahvajucca suprać nas pravierki, ale kryminalnaja sprava ŭsio jašče nie zaviedzienaja, bo naša dziejnaść całkam zakonnaja. Toje, što na telebačańni prajšli repartažy ab našaj dziejnaści, padobna na palityčny zakaz, pryčym, tych ludziej, što pracujuć na susiedniuju dziaržavu», — ličyć Pavieł Buka.
Instytut matematyki i kibiernetyki aficyjna zarehistravanaja struktura, jakaja dziejničaje ad 1997 hoda. Instytut stavić za metu stvareńnie biełaruskamoŭnaha VNU ŭnutry krainy.