Viadomyja biełaruskija muzyki zapišuć pieśni na vieršy rasstralanych paetaŭ
Partał TuzinFM raspačaŭ prajekt «(Nie) rasstralanaja paezija», u jakim voźmuć Lavon Volski, Źmicier Vajciuškievič, Cvieta Bień, Kaciaryna Vadanosava, hurty Dzieciuki, Vuraj, Re1ikt, Akute dy inšyja viadučyja biełaruskija muzyki.
Udzielniki prajektu stvorać pieśni na vieršy paetaŭ, jakija byli rasstralanyja 29 kastryčnika 1937 hodu. Kožny ŭžo abraŭ «svajho» paeta. Hurt Naka, naprykład, napiša muzyku na adzin z tvoraŭ Valeryja Marakova, repier Angst — Ziamu Pivavarava, TonqiXod uziaŭ Todara Klaštornaha, Pomidor/off — Majsieja Kulbaka. Usiaho paŭstanie 12 novych kampazycyj ad 12 vykanaŭcaŭ.
«My nie damo ścierci z narodnaj pamiaci tvory i tvary biełaruskich paetaŭ Rasstralanaha Adradžeńnia. Z dapamohaj našaha prajektu my chočam skazać, što choć aŭtary i rasstralanyja, ich tvorčuju spadčynu źniščyć niemahčyma, — zaznačaje kiraŭnik prajektu Siarhiej Budkin. — My addajem daninu pavahi paetam i ŭklučajem ich tvorčaść u sučasny kulturny kantekst: ich vieršy praz stahodździe paśla napisańnia stanuć pieśniami. I kab usio atrymałasia pryhoža i jakasna, my zaklikajem padtrymać prajekt kožnaha, kamu nieabyjakavaja hetaja tema».
Admysłova da prajektu režysior Arciom Łobač zrabiŭ proma-rolik, u jakim źnialisia Pavał Charłančuk, Andrej Saŭčanka i Alena Hiranok.
Užo startavała kraŭdfandynhavaja kampanija na Talaka.by. Tyja, chto padtrymaje prajekt, atrymaje zaprašeńni na kancertnuju prezientacyju, a taksama inšyja padarunki. Siarod jakich «maŭklivyja knihi» — natatniki z vyjavami paetaŭ dy cytatami ź ich tvoraŭ. «Heta mietafara pierarvanaj tvorčaści, pomnik nienapisanamu, niedastvoranamu, niepračytanamu. Heta mahčymaść adčuć piersanalnuju poviaź z tvorcam, praciahnuć jahonuju spravu, zapoŭnić staronki słovam», — hetak tłumačyć ideju Kaciaryna Pikirenia, jakaja ciapier pracuje nad dyzajnierskaj sieryjaj z 12 natatnikaŭ-knih. Jaje prezientacyja adbudziecca taksama ŭ miežach prajektu.
Akramia muzyčnaj i dyzajnierskaj častki ŭ prajekcie budzie jašče i adukacyjny składnik — na vosień zapłanavana zładzić 12 adkrytych lekcyj. Kožnuju ź ich praviadzie znaŭca žyćcia i tvorčaści kankretnaha tvorcy razam z muzykami. Padčas lekcyj upieršyniu buduć zajhranyja ŭžyvuju pieśni na słovy paetaŭ.
Padtrymać prajekt
