U KNDR pryhrazili pieratvaryć ZŠA ŭ popieł previentyŭnym udaram
Aficyjnaja hazieta pracoŭnaj partyi KNDR «Nadon Sinmun» pryhraziła ZŠA mahčymaściu naniasieńnia «supiermahutnaha previentyŭnaha ŭdaru» na fonie słoŭ dziaržsakratara Reksa Tylersana ab tym, što ZŠA šukajuć sposab uzmacnić cisk na KNDR, kab prymusić jaje zharnuć jadziernuju prahramu, paviedamlaje RBK.
«Kali my zrobim naš supiermahutny previentyŭny ŭdar, jon całkam i nieadkładna źniščyć nie tolki amierykanskija impieryjalisckija siły, jakija ŭvarvalisia ŭ Paŭdniovuju Kareju, i navakolnuju terytoryju, ale i macierykovuju častku ZŠA, ścioršy jaje ŭ popieł», — pryvodzić Reuters vytrymku z materyjału haziety.
Dziaržsakratar ZŠA Reks Tylersan u sieradu, 19 krasavika, zajaviŭ, što Štaty siarod sposabaŭ cisku na KNDR razhladajuć mahčymaść viartańnia krainy ŭ śpis fundataraŭ teraryzmu. Pry hetym, pa słovach Tylersana, razhladajucca i inšyja miery, «z dapamohaj jakich my zmožam prymusić režym u Pchieńjanie supracoŭničać z nami». KNDR znachodziłasia ŭ śpisie krain — sponsaraŭ teraryzmu, składzienym Dziaržaŭnym departamientam ZŠA, z 1988 hoda pa 2008 hod.
Raniej u Hienštabie KNDR zajavili, što hatovyja nanieści previentyŭny ŭdar pa ZŠA i Paŭdniovaj Karei ŭ vypadku pravakacyj z boku Vašynhtona. Mahčymymi celami ŭ Hienštabie nazvali amierykanskija vajennyja bazy ŭ Japonii, Paŭdniovaj Karei i rezidencyi prezidenta ŭ Sieule.
