Dziasiatki tysiač vieniesuelcaŭ vyjšli na «maci ŭsich pratestaŭ»
Niekalki dziasiatkaŭ tysiač žycharoŭ Vieniesueły pryniali ŭ sieradu ŭdzieł u masavych pratestnych akcyjach u stalicy krainy Karakasie i jašče ŭ 20 haradach krainy. Jak paviedamlajuć ŚMI sa spasyłkaj na vidavočcaŭ, padčas akcyi ŭ Karakasie student atrymaŭ kulavoje ranieńnie ŭ hałavu, u vyniku čaho pamior.
Reuters
Demanstranty patrabujuć praviadzieńnia daterminovych vybaraŭ i vyzvaleńnia z turmy lidaraŭ apazicyi, piša VVS.
Apazicyjnyja akcyi, što adbylisia siońnia, mohuć stać najbujniejšymi ŭ krainie za apošnija try hady. Aktyvisty ŭžo nazyvajuć ich «maci ŭsich pratestaŭ» i «druhim dniom niezaležnaści».
Paralelna ŭ Karakasie prajšoŭ i marš prychilnikaŭ dziejnaha prezidenta Nikałasa Madury, jakija abvinavačvajuć apazicyjnych aktyvistaŭ u sprobie arhanizavać dziaržaŭny pieravarot.
AFP
U Vieniesuele praciahvajecca supraćstajańnie pamiž prezidentam i apazicyjaj, jakaja kantraluje parłamient. Praciŭniki Madury ličać, što jaho palityka pryviała da najmacniejšaha ekanamičnaha kryzisu i padaŭleńnia demakratyčnych svabod.
Pavodle danych MVF, uzrovień inflacyi ŭ krainie sioleta moža pieravysić 700%.
Sam prezident kaža, što jaho apanienty sprabujuć zładzić dziaržaŭny pieravarot pry padtrymcy ZŠA.
Napiaredadni ministerstvy zamiežnych spraŭ 11 łacinaamierykanskich krain źviarnulisia da Madury z prośbaj pravieści daterminovyja vybary ŭ svajoj krainie, kab pakłaści kaniec ekanamičnamu kryzisu i palityčnaj niestabilnaści.