Pravaabaroncy skłali śpis sudździaŭ, jakija vynosiać palityčna matyvavanyja prysudy
Pavodle pravaabaroncaŭ, 14 sudździaŭ, jakija raniej byli ŭ čornym śpisie Eŭraźviazu za ŭdzieł u palityčnym pieraśledzie apanentaŭ uładaŭ, praciahvajuć karać aktyvistaŭ hramadzianskaj supolnaści, niezaležnych žurnalistaŭ, udzielnikaŭ mirnych akcyjaŭ pratestu.
Ilustracyjnaje fota. Sudździa Valery Jeśman
Proźviščy sudździaŭ, jakija biespadstaŭna karali za «łajanku», «niepadparadkavańnie milicyi», «udzieł u niesankcyjanavanym mierapryjemstvie», pryviedzienyja ŭ tablicy, padrychtavanaj pravaabaroncami «Viasny».
Siarod inšaha ŭ bazie «Viasny» značycca 17 prysudaŭ, vyniesienych u peryjad pamiž 1 studzienia 2016 hodu i 14 sakavika 2017-ha Valeram Jeśmanam. Letaś u kastryčniku jon asudziŭ da 2 hadoŭ pazbaŭleńnia voli z adterminoŭkaj vykanańnia prysudu Źmitra Palijenku. 7 krasavika ŭ suviazi z administracyjnymi vyrakami aktyvista prysud jamu byŭ zamienieny realnym terminam u kalonii.
Zafiksavana taksama 19 palityčnych prysudaŭ, vyniesienych sudździom Viktaram Kazakom u peryjad pamiž 1 studzienia 2016 hodu i 17 lutaha 2017-ha. Jon, u pryvatnaści, prysudziŭ aktyvistu Paŭłu Vinahradavu štraf za akcyju pratestu 17 lutaha 2017 hodu. Paśla Kazak vynosiŭ vyraki za akcyi 25 i 26 sakavika ŭ Miensku, u tym liku palityku Alesiu Łahvincu, jaki byŭ preventyŭna zatrymany napiaredadni masavych mierapryjemstvaŭ.
Ale rekardsmenka ŭ hetym pieraliku sudździa Taciana Matyl, jakaja ŭ peryjad pamiž 1 studzienia 2016 hodu i 10 sakavika 2017-ha vyniesła 31 prysud z palityčnych matyvaŭ. Jana sudziła zatrymanych 25 i 26 sakavika, u tym liku žurnalista telekanału «Biełsat» Alaksandra Barazienku, jaki aśviatlaŭ akcyju na Dzień Voli ŭ Miensku.
31 lipienia 2015 hodu Rada Eŭraźviazu vyklučyła z sankcyjnaha śpisu biełaruskich sudździaŭ, datyčnych da palityčnaha pieraśledu hramadzianaŭ u 2010-2012 hadach.
