«Jaho aryštavali za pajezdku ŭ Karpaty». Chto taki Uładzimir Fiodaraŭ sa «spravy patryjotaŭ»?
Aryštavany pa «spravie patryjotaŭ» Uładzimir Fiodaraŭ nie znachodziŭsia ni ŭ jakich tajnych albo jaŭnych arhanizacyjach, a padstavy dla jaho aryštu absalutna absurdnyja, pierakonvaje jaho tavaryš.
29 sakavika ŭ Minsku byŭ aryštavany ŭradženiec Babrujsku Uładzimir Fiodaraŭ. Jon staŭ čarhovym fihurantam «spravy patryjotaŭ». Praz 10 dzion paśla aryštu jaho nie vypuścili z-pad varty, što aznačaje, što jamu było pradjaŭlenaje abvinavačvańnie pa artykule 293 («padrychtoŭka masavych biesparadkaŭ») albo pa artykule 287 Kryminalnaha kodeksu («stvareńnie niezakonnaha ŭzbrojenaha farmavańnia»). U presie nie źjaŭlałasia infarmacyi pra Uładzimira, jaho siamja pakul nie hatovaja davać kamientary. Na ŭmovach ananimnaści raspavieści pra źniavolenaha chłopca pahadziŭsia siabra Uładzimira Fiodarava, jaki dobra jaho viedaje.
«Vałodziu 29 hadoŭ. Jon skončyŭ histfak BDU, zatym mahistraturu, dapisvaŭ kandydackuju dysiertacyju. Adkazny i prystojny chłopiec, spakojny i ŭraŭnavažany. Vałodzia nikoli nie znachodziŭsia ŭ jakich-niebudź nacyjanalistyčnych arhanizacyjach abo ruchach — heta ja mahu absalutna dakładna skazać. Sam pa sabie jon daloki ad palityki. Apošnija 2,5 hoda pracuje ŭ łahistycy. Na pracy jon niaredka pravodzić bolš za 12 hadzin, i heta mohuć paćvierdzić jaho kalehi. Tak što praca dla jaho — samaje hałoŭnaje. Sama nahoda dla jaho zatrymańnia (pajezdka ŭ Karpaty) — prosta śmiešnaja. Dziasiatki tysiač biełarusaŭ kožny hod naviedvajuć ukrainskija hory, i ničoha złačynnaha ŭ hetym niama i być nie moža pa vyznačeńni. Chaj supracoŭniki KDB i inšyja siłaviki, jakija prosta vysłužvajucca pierad načalstvam, uśviedamlajuć, što takimi dziejańniami jany łamajuć žyćci ni ŭ čym nie vinavatych ludziej», — raskazvaje jon.
Siabar Uładzimira Fiodarava śćviardžaje, što adzinaj padstavaj dla aryštu stała toje, što vosieńniu minułaha hodu jon pajechaŭ na adpačynak va ŭkrainskija Karpaty ŭ kampanii ź inšymi fihurantami «spravy patryjotaŭ» — vyratavalnikam Andrejem Dundukovym i niekalkimi biełaruskimi aficerami. «Inšaj pryčyny dla aryštu, niahledziačy na ŭsiu jaje absurdnaść, ja nie baču», — śćviardžaje tavaryš Uładzimira Fiodarava.
