Paźniak: Uznačalić kamisiju pa Kurapatach? Pryjechać u Biełaruś nie mahu, bo ŭ krainie, dzie pravić Łukašenka, nie dziejničajuć zakony
Nobeleŭskaj laŭreatcy Śviatłanie Aleksijevič patelefanavali z prezydenckaj administracyi i prapanavali ŭznačalić kamisiju pa vyznačeńni varyjantu pomnika ŭ Kurapatach.
Na što piśmieńnica adkazała, što hetym pavinny zajmacca ludzi, dla jakich Kurapaty byli spravaj žyćcia. I ŭznačalvać takuju kamisiju mieŭ by prava tolki Zianon Paźniak. A ŭ kamisii, u svaju čarhu, pavinna być «bolš ludziej, jakija nasamreč zrabili Kurapaty Kurapatami».
Hetaja zajava Śviatłany Aleksijevič ciapier aktyŭna abmiarkoŭvajecca ŭ sacsietkach, i mnohija vykazvajuć mierkavańnie, što mienavita Paźniak moh by uznačalić takuju kamisiju. A voś jak adreahavaŭ na heta adkryvalnik Kurapataŭ, staršynia KCHP BNF Zianon Paźniak:
«Pazvanili Aleksijevič, prapanavali joj heta ŭznačalić. Jana zrazumieła, što chočuć za jaje plačyma schavać brydkuju spravu i admoviłasia. U pryncypie, słušna zrabiła. A što datyčyć što havorać u sacyjalnych sietkach, kab Paźniak uznačaliŭ i hetak dalej. Paźniaku treba pryjechać, kab uznačalvać. A pryjechać jon nia moža, tamu što ŭ hetaj krainie, dzie pravić Łukašenka, nia dziejničajuć zakony. Tudy jechać nielha, tamu heta čysta rytaryčnaja prapanova. A što miarkujuć ludzi ŭ sacsietkach, ja nie liču patrebnym kamentavać i prapanoŭvać».
Adkryvalnik Kurapataŭ Zianon Paźniak, jaki z 1996 hodu znachodzicca ŭ palityčnaj emihracyi, ličyć, što narodny memaryjał u Kurapatach užo stvorany. Jak tolki byŭ abvieščany konkurs, jon zaklikaŭ tvorcaŭ nie ŭdzielničać u im.
