Top-7 suśvietnych trendaŭ u śfiery infarmacyjnych technałohij. Kamientuje Viktar Prakapienia
Hłabalnymi suśvietnymi trendami ŭ najbližejšyja hady stanuć ŭkaranieńnie štučnaha intelektu na šmatlikija pryłady, rost vydatkaŭ karparacyj na IT-pasłuhi i sčytvańnie bijamietryčnych dadzienych u roznych śfierach. Mižnarodnaja sietka Deloitte apublikavała novaje daśledavańnie, u jakim ekśpierty prahnazujuć raźvićcio najnoŭšych technałohij. Pra toje, jak dadzienyja trendy paŭpłyvajuć na Biełaruś i ajčynny siektar IT, my paprasili prakamientavać viadomaha biełaruskaha IT-pradprymalnika Viktara Prakapieniu.
Mašynnaje navučańnie: smartfony stanuć jašče razumniejšymi
Technałohija mašynnaha navučańnia (navučańnie i raźvićcio štučnaha intelektu ŭ pracesie vyrašeńnia mnostva padobnych zadač) — adzin z klučavych i ŭpłyvovych trendaŭ. Pavodle daśledavańnia, na praciahu hoda budzie pradadziena kala 300 młn smartfonaŭ, abstalavanych hetaj funkcyjaj.
Užo ŭ bližejšy čas technałohija dapamoža navihacyi ŭ zakrytych pamiaškańniach, kłasifikacyi malunkaŭ, raźvićciu dapoŭnienaj realnaści, a taksama raspaznańniu maŭleńnia i pierakładu navat pry adsutnaści suviazi. U pierśpiektyvie ž mašynnaje navučańnie budzie prymianiacca ŭ bieśpiłotnych latalnych aparatach, lehkavych aŭtamabilach, pryładach virtualnaj abo dapoŭnienaj realnaści, u miedycynskim abstalavańni, u pryborach, padłučanych da internetu rečaŭ.
Aŭtary daśledavańnia adznačajuć, što mašynnaje navučańnie karennym čynam źmienić uzajemadziejańnie čałavieka i technałohij va ŭsich halinach ekanomiki.
Viktar Prakapienia: Ja dumaju, što nie budzie ŭ śviecie krain, na jakija trend mašynnaha navučańnia i štučnaha intelektu nie akaža istotnaha ŭpłyvu. Abjom ekanamičnaj karyści, jakaja moža być stvorana, dastatkova dobra charaktaryzujecca mierkavańniem pra toje, što pieršyja trylijaniery na našaj płaniecie źjaviacca ŭ vyhladzie stvaralnikaŭ praduktaŭ z vykarystańniem technałohij mašynnaha navučańnia.
Taksama isnuje mierkavańnie, što raźvićcio mašynnaha navučańnia navat źmienić čałaviectva jak bijałahičny vid, a mahčyma — pryviadzie da stvareńnia novaj, štučnaj formy žyćcia. Nieviadoma, chto budzie mieć racyju, ale vidavočna, što my havorym pra vielmi maštabnyja źmieny śvietu. Biełaruski IT-siektar chutka i dynamična raźvivajecca. Pahladzicie, jakaja kolkaść IT-mierapryjemstvaŭ prachodzić u našaj krainie pastajanna. Ni adna inšaja industryja ŭ Biełarusi nie moža pachvalicca choć čymści addalena padobnym. Ja vieru, što biełaruskija śpiecyjalisty zmohuć aktyŭna ŭdzielničać u raźvićci trendu mašynnaha navučańnia.
Vydatki biznesu na IT-servisy vyrastuć bolš čym na 50%
Ekśpierty Deloitte prahnazujuć značny rost vydatkaŭ biznesu na IT-servisy ŭ najbližejšy čas. Pa ich acenak, da kanca 2018 hoda ahulnyja vydatki na absłuhoŭvańnie ŭ data-centrach, vydatki na prahramnaje zabieśpiačeńnie i IT-padtrymku vyrastuć z $361 młrd u 2016 hoda da amal $550 młrd.
Košt IT-servisaŭ dazvalaje paźbiehnuć značnych kapitalnych vydatkaŭ i zabiaśpiečvaje prahnazavanyja vydatki na asnovie faktyčnaha vykarystańnia, jakoje lohka maštabujecca ŭ zaležnaści ad patrebaŭ biznesu.
Viktar Prakapienia: Biełaruski IT-siektar raście dvuchznačnymi ličbami šmat hadoŭ. U vypadku, kali dziaržaŭnaja padtrymka dadzienaha siektara praciahniecca, ja dumaju, što my možam nazirać takija ž tempy rostu i dalej.
Internet rečaŭ na słužbie chakieraŭ?
Raźmierkavanyja kibierataki pa typu «admova ŭ absłuhoŭvańni» (DDoS-napady) stanuć bolš častymi i stanuć bolš maštabnymi. Pavodle daśledavańnia, siaredni maštab napadaŭ u miesiac pieravysić adzin terabit u siekundu, ich ahulnaja kolkaść pierasiahnie 10 młn, a siaredniaja mahutnaść ataki składzie 1,25—1,5 hihabitu u siekundu (Hbit/siek).
Mižvolnym pamočnikam chakieraŭ stanie internet rečaŭ — nieabaronienyja pryłady, padłučanyja da jaho, mohuć vykarystoŭvacca navat niespraktykavanymi złamyśnikami dla pavieličeńnia mahutnaści kibierataki.
Viktar Prakapienia: Kibierbiaśpieka, biassprečna, adna z samych vialikich prablem, jakija stvarajucca technałahičnym prahresam apošnich dziesiacihodździaŭ. U knihach pa vajennaj stratehii časta pišuć pra toje, što ludzi zvyčajna rychtujuć siabie da toj vajny, što kaliści była, zamiest taho, kab rychtavacca da toj novaj vajny, jakaja budzie. DDoS, na moj pohlad, moža być dobrym tamu prykładam.
Jość vialikaja imaviernaść taho, što ałharytmy mašynnaha navučańnia zmohuć pamienšyć pamier prablemy DDOS u dziasiatki ci sotni razoŭ, jak heta ŭ svoj čas adbyłosia sa spamam. Ja dumaju, što nas čakajuć prablemy kibierbiaśpieki zusim inšaha ŭzroŭniu, i vielmi składana zrabić jakija-niebudź pradkazańni ŭ hetych adnosinach. U cełym mnie padabajecca ideja pra toje, što lubyja ekanamičnyja pradkazańni ničoha nie kažuć nam pra budučyniu, ale zatoje raspaviadajuć mnohaje pra toje, chto ich robić.
Płanšety ŭžo nie ŭ trendzie
Prodažy płanšetaŭ buduć padać. Pavodle acenak śpiecyjalistaŭ Deloitte, u 2017 hodzie jany źniziacca prykładna na 10% da 165 młn, u toj čas jak u 2016 hodzie było pradadziena 182 młn.
Pry hetym popyt na smartfony, televizary i kampjutary zastajecca stabilnym. Padobna na toje, pik popytu na płanšety zastaŭsia zzadu.
Viktar Prakapienia: Kala 10 hadoŭ tamu ja byŭ na kanfierencyi. Tam ža byŭ śpikier z Nokia, jaki surjozna kazaŭ, što pytańnie na miljard dalaraŭ: jakoha pamieru pavinien być mabilny telefon. Samy vialiki pamier, jaki jon nie pabajaŭsia nazvać, byŭ suvymierny z pačkam cyharet. Siońnia my bačym, što 5,5 cali — ekran iPhone 7 — nie miaža, a Nokia u tym vyhladzie, u jakim jana była tady, pierastała isnavać.
Nichto nie viedaje, jak budzie vyhladać mabilnaja pryłada budučyni, jaki mienavita sposab pieradačy infarmacyi ad čałavieka pryładzie budzie vykarystoŭvacca. Ja vielmi vieru ŭ toje, što dapoŭnienaja realnaść stvoryć vielizarnuju kolkaść ekanamičnaj kaštoŭnaści i vakoł jaje buduć raźvivacca novyja kampjutarnyja pryłady budučyni. Pra heta ciapier kažuć kiraŭniki vialikich IT -karparacyj, u hetym kirunku iduć vielizarnyja inviestycyi, i nad hetymi pytańniami pracuje vialikaja kolkaść talenavitych ludziej.
Užo siońnia mnohija kažuć nie stolki pra telefon, jak pra asnoŭnuju pryładu, jak pra kamieru ŭ im. Kamiera moža być novaj kłavijaturaj, kali buduć stvorany sposaby ŭzajemadziejańnia pamiž čałaviekam i kampjutaram bieź interfiejsaŭ. Kožny dzień kampanii testujuć novyja pryłady, adnak jakoj mienavita budzie mabilnaja pryłada budučyni, navat składana ŭjavić. Jość mierkavańni, što bolšaja častka čałaviečaha cieła moža być mabilnaj pryładaj, pryčym nieabaviazkova sucelnaj. Całkam mahčyma najaŭnaść u adnaho mozhu niekalkich ciełaŭ i adnačasovaje znachodžańnie na niekalkich kantynientach adnoj i toj ža asoby.
Padčas napisańnia hetaha tekstu vyjšła navina pra toje, što Iłan Mask stvaryŭ kampaniju, jakaja budzie raspracoŭvać pryłady dla naŭprostaha złučeńnia mozhu i kampjutara. Užo ciapier niama sumnieńniaŭ u tym, što my praź niejki čas pabačym mabilnyja pryłady, jakija kirujucca siłaj dumki — biez kłavijatur, myšak i tačpadaŭ. Nastupnyja 50 hadoŭ abiacajuć być vielmi cikavymi.
Bijamietryčnyja srodki abarony tryvała ŭvojduć u naša žyćcio
U pačatku 2017 hodu kolkaść pryład z funkcyjaj bijamietryčnaha sčytvalnika adbitkaŭ palcaŭ pieravysiła adzin miljard.
Adnym z trendaŭ stanie pašyreńnie vykarystańnia technałohii sčytvańnia adbitkaŭ palcaŭ i inšych bijamietryčnych paramietraŭ čałavieka. Heta dazvolić zabiaśpiečvać apieratyŭnuju i nadziejnuju identyfikacyju asoby, što, u svaju čarhu, zrobić śviet bolš biaśpiečnym.
5G. Suviaź novaha pakaleńnia
Tolki-tolki ŭ Biełarusi pačała ŭkaraniacca suviaź čaćviortaha pakaleńnia (4G), jak užo treba rychtavacca da novaj «revalucyi» — imklivaha raźvićcia 5G.
U 2017 hodzie buduć zroblenyja najvažniejšyja kroki ŭ kirunku razhortvańnia sietak mabilnaj suviazi piataha pakaleńnia, śćviardžajuć ekśpierty Deloitte. Abnaŭleńnie sietak čaćviortaha pakaleńnia (4G), a taksama abmiežavanaje ŭžyvańnie pieršych sietak 5G daduć karystalnikam i apierataram vysokuju chutkaść, mienšuju zatrymku sihnału i mahčymaść padtrymki nizkavoltnych i nizkachutkasnych pryład internetu rečaŭ.
Nakolki ŭnutrybiełaruskija trendy supaduć ź mižnarodnymi?
«Ja nie razumieju słovazłučeńnia «ŭnutrybiełaruski trend». Śviet hłabalny, dziaržaŭnyja miežy i inšyja abmiežavańni — heta paradyhmy minułaha. U Biełarusi svabodny internet, isnujuć sučasnyja standarty suviazi, dastatkova libieralnaje zakanadaŭstva ŭ dačynieńni da IT-kampanij, adkrytyja miežy. Tamu kazać možna tolki ab suśvietnych trendach i pra Biełaruś jak adnu z krain, dzie jany prajaviacca.
Hłabalnaja aŭtamatyzacyja ŭžo istotna źmianiła rynak pracy. Kali prahnozy, naprykład, pra toje, što ŭ hramadstvie budzie pracoŭnych miescaŭ tolki na 10% nasielnictva, spraŭdziacca, to śviet, u jakim my budziem žyć praz 50 hadoŭ, budzie pryncypova adroźnivacca ad taho, u jakim my žyviem zaraz, litaralna va ŭsim. I heta zdarycca va ŭsich krainach, u tym liku i ŭ Biełarusi», — padvodzić vynik Viktar Prakapienia.
