U Biełarusi 30% baćkoŭ ličać fizičnaje pakarańnie nieadjemnaj častkaj pravilnaha vychavańnia
Bolš za 30% baćkoŭ ličać, što pravilnaje vychavańnie dziciaci ŭklučaje fizičnaje pakarańnie. Takija vysnovy nacyjanalnaha daśledavańnia pa acency raspaŭsiudžanaści hvałtu ŭ dačynieńni da dziaciej, paviedamiŭ siońnia na pres-kanfierencyi starejšy kaardynatar prahramnaj dziejnaści pa abaronie pravoŭ dziaciej pradstaŭnictva Dziciačaha fondu AAN (JUNISIEF) u Biełarusi Alaksandr Karankievič, pieradaje BiełTA.
Alaksandr Karankievič raspavioŭ pra papiarednija vyniki nacyjanalnaha daśledavańnia, praviedzienaha letaś JUNISIEF sumiesna ź ministerstvami adukacyi, achovy zdaroŭja, unutranych spraŭ, pracy i sacyjalnaj abarony. Było apytana praz ankietavańnie bolš za 8 tys. respandentaŭ, ź ich 5 tys. — dzieci va ŭzroście ad 10 da 17 hadoŭ, jakija pražyvajuć u siemjach, u dziciačych internatnych ustanovach, śpiecyjalnych ustanovach.
Tak, 31% apytanych baćkoŭ całkam zhodnyja sa śćviardžeńniem, što pravilnaje vychavańnie dziciaci ŭklučaje fizičnaje pakarańnie. 29,3% baćkoŭ ličać, što časam remień nieabchodny dla dyscyplinavańnia dziciaci. Tolki 30% tat i mam zhodnyja z tym, što mnohija prablemy možna vyrašać šlacham dyjałohu. Amal pałova baćkoŭ (48%) upeŭnienyja, kab dzicia damahłosia pośpiechu ŭ žyćci, jaho treba nie tolki zaachvočvać, ale i karać. 36,4% baćkoŭ ličać, što tyja, chto nie ŭžyvajuć pakarańnie ŭ adnosinach da svaich dziaciej, psujuć ich.
«Kab zmahacca z takimi baćkoŭskimi ŭstanoŭkami, treba šyroka infarmavać nasielnictva ab niehvałtoŭnych mietadach vychavańnia dziaciej. Tut važna praviadzieńnie maštabnych kampanij, takich jak respublikanskaja akcyja «Dom biez hvałtu», jakaja startavała siońnia ŭ Biełarusi», — padkreśliŭ Alaksandr Karankievič.
Jak pakazała daśledavańnie, siarod navučencaŭ 5-7 kłasaŭ ahulnaadukacyjnych škoł kožny piaty chłopčyk i kožnaja siomaja dziaŭčynka doma padviarhalisia cialesnym pakarańniam, kožny dziaviaty navučeniec 9-11 kłasaŭ — roznym formam fizičnaha hvałtu. Kala 24,3% navučencaŭ ustanoŭ prafiesijna-techničnaj adukacyi paćvierdzili, što padviarhalisia ŭ siamji fizičnamu albo psichałahičnamu hvałtu. Kala 84% apytanych u kałonijach dla niepaŭnaletnich pryznali, što da hetaha (kali žyli ŭ siamji) adčuvali hvałt.
Vyniki daśledavańnia paćvierdzili niepasrednuju suviaź pamiž pieraniesienym hvałtam u dziacinstvie z boku baćkoŭ i prymianieńniem hvałtu ŭžo ŭ darosłym žyćci ŭ adnosinach da svaich dziaciej — tak zvanaja estafieta nasilla. Tak, bolš za 56% baćkoŭ, jakija ŭ dziacinstvie padviarhalisia hvałtoŭnym mietadam dyscyplinavańnia, užyvajuć takija mietady ŭ adnosinach da svaich dziaciej. Zvyš za 51% baćkoŭ pryznali, što vykarystoŭvali žorstkija dyscyplinarnyja mietady u adnosinach da svaich dziaciej u minułym miesiacy, a 28,5% — užyvali fizičnyja pakarańni. 17,4% baćkoŭ prytrymlivajucca pazicyi ab efiektyŭnaści i abhruntavanaści cialesnych pakarańniaŭ dziaciej.
Poŭnaja spravazdača ab daśledavańni budzie prezientavanaja ŭ mai biahučaha hoda.
