Anarchista Źmitra Palijenku pryznali palitviaźniem
Pravaabaroncy pryznali aktyvista Źmitra Palijenku palitviaźniem i patrabujuć jaho nieadkładnaha vyzvaleńnia, paviedamlajecca na sajcie «Viasny.
Padstavaj dla kryminalnaha pieraśledu Palijenki staŭ jahony ŭdzieł u mirnaj akcyi ravarystaŭ «Krytyčnaja masa», jakaja adbyłasia 29 krasavika 2016 hoda. Akcyja była hvałtoŭna spynienaja supracoŭnikami milicyi, z prymianieńniem niepraparcyjnaj siły. U vyniku šaściora ŭdzielnikaŭ, uklučna z Palijenkam, byli zatrymanyja.
12 kastryčnika 2016 hoda Źmicier Palijenka byŭ asudžany pa artykule 364 Kryminalnaha kodeksa Respubliki Biełarusi (hvałt albo pahroza ŭžyvańnia hvałtu ŭ dačynieńni da supracoŭnikaŭ orhanaŭ unutranych spravaŭ) i pa častcy 2 artykuła 343 KK (vyrab i raspaŭsiud parnahrafičnych materyjałaŭ abo pradmietaŭ parnahrafičnaha charaktaru).
«Pravaabaroncy ŭpeŭnienyja, što hetyja abvinavačvańni nie znajšli svajho paćvierdžańnia ŭ sudzie i nie byli zamacavanyja dastatkovymi dokazami.
Adznačajučy hetyja akaličnaści i padkreślivajučy nievykanańnie dziaržavaj pazityŭnych abaviazalnictvaŭ pa sadziejničańni realizacyi pravoŭ na mirnyja schody i svabodnaje vykazvańnie mierkavańniaŭ, abaronie ŭdzielnikaŭ mirnych schodaŭ, pravaabaroncy pryjšli da vysnovy: asudžeńnie Źmiciera Palijenki niepasredna stałasia vynikam realizacyi im svabody mirnych schodaŭ i vykazvańnia mierkavańnia, što dazvalaje kvalifikavać sacyjalnaha aktyvista jak palityčnaha źniavolenaha», — paviedamlajuć pravaabaroncy.
Nahadajem, 7 krasavika 2017 hoda sud Zavodskaha rajona h. Minska admianiŭ adterminoŭku vykanańnia pakarańnia, i Źmicier Palijenka padlahaje nakiravańniu ŭ papraŭčuju kałoniju dla adbyćcia pakarańnia ŭ vyhladzie pazbaŭleńnia voli terminam na 1,5 hady (z ulikam času ŭtrymańnia pad vartaj da sudu ŭ 2016 hodzie).
