U Mahilovie pabudujuć «Tryumfalnuju arku». Eklektyka, mulaž, — kažuć pra jaje ekśpierty
Tak budzie vyhladać arka
U Mahilovie zadumali ŭźvieści arku na ŭjedzie ŭ horad ź mienskaha napramku. Miascovaja presa piša, što arka stanie ŭpryhožańniem horadu. Pabudujuć jaje ŭ honar 750-hodździa Mahilova.
U harvykankamie prapanavali abviaścić prajekt «narodnaj budoŭlaj». Užo adkryty dabračynny rachunak. Košt nie nazyvajecca.
Miesca pad arku abrali na ŭskrajku mikrarajonu «Kazimiraŭka». Razvarotnaje koła ŭžo abharadzili ščylnym płotam, za jakim viaducca pracy.
Balšynia tych, z kim udałosia pahutaryć u Kazimiraŭcy, kazali, što ŭ pasieliščy nie adzin hod paradkujuć Mienskuju šašu. Pryvatnyja damy i pramysłovyja abjekty, jakija stajać pry darozie, chavajuć za adnatypnaj aharodžaj.
Placoŭka pad arku aharodžana ščylnym płotam
Pra navabud na šašy žychary Kazimiraŭki kazali tak:
«Dy nia viedajuć, kudy ŭžo hrošy padzieć. Zavody ŭ horadzie stajać, a jany niejkuju tryjumfalnuju arku vydumali», — z razdražnieńniem adreahavaŭ na navinu adzin z surazmoŭcaŭ.
«A navošta jana tam…» — biez achvoty praciahvać hutarku adazvaŭsia inšy.
Za aharodžaj užo pracujuć budaŭniki
«Budaŭnictva arki stanie etapam, jakim budzie zavieršana rekanstrukcyja Mienskaj šašy», — paviedamlaje mogilevnews.by.
«Arka ŭpryhožyć ujezd u horad z boku stalicy i budzie ŭźviedzienaja ŭ honar 750-hodździa Mahilova, — piša partał, spasyłajučysia na źviestki ź planerki ŭ harvykankamie. — Da hetaj daty horad rychtujecca poŭnamaštabna, jak u planie dobraŭparadkavańnia terytoryjaŭ i ŭžo ŭźviedzienych abjektaŭ, hetak i budaŭnictva novych».
Mahilovu nie chapaje łosku
Staršynia abłasnoj arhanizacyi AHP Uładzimier Šancaŭ pryhadaŭ letašni vizyt Łukašenki ŭ Mahiloŭ i jahonuju niezadavolenaść tym, jak vyhladaje horad. Łukašenka tady zajaviŭ, što «horadu nie staje łosku».
Tym časam u centry horadu na vulicy Łazarenki razburajucca staryja damy, pomniki architektury
Na dumku Šancava, miascovaje čynavienstva ciapier imkniecca ŭsialak dahadzić Łukašenku navabudami, adarvanymi ad nadzionnych prablemaŭ haradžan:
«Ciapier varta havaryć nie pra łosk, a pra naviadzieńnie paradku ŭ dvarach damoŭ, na darohach. Niestaje dziciačych placovak. Naahuł spalnyja rajony horadu ŭ žachlivym stanie, — krytykuje zadumu harvykankamu Šancaŭ. — U nas sorak deputataŭ harsavietu, 60 — abłasnoha savietu, i jany nia mohuć zapiarečyć hłupstvu. Marnujucca vialikija srodki ni na što. Uzialisia za arku i abviaścili jaje «narodnaj budoŭlaj», a ŭ narodu ci zapytalisia? Zrazumieła, budzie dobraachvotna-prymusovaje vymańnie srodkaŭ u pradpryjemstvaŭ i pradprymalnikaŭ».
Heta most cieraz rečku Dubravienku. Jon za try sotni metraŭ ad niadaŭna adramantavanaha mosta praz Dniapro. Transpartnuju raźviazku ahladaŭ Łukašenka, ale da mosta cieraz Dubravienku jaho nie daviali
«My tolki pieražyli chvalu zdušeńnia pratestu suprać dekretu № 3, i ciapier my apynulisia ŭ sytuacyi niezrazumieła jakoj eŭfaryi, — dadaje palityk. — Usio heta prykryvajecca šlachietnymi, humannymi idejami. U Mahilovie ŭzvodziać tryjumfalnuju arku z nahody čaho?»
Mahiloŭski mastak Bazyl Kamaroŭ u interviju Svabodzie kazaŭ: «Mahiloŭ nia maje svajho architekturnaha abličča». Majstar bačyŭ prajekt arki. Na jahonuju dumku, harvykankamaŭskaja ideja nie nablizić horad da viartańnia svajho admietnaha vobrazu.
«Prapanavanaja arka — eklektyka. Jana nibyta pryviazanaja da histaryčnaha prajektu, ale nasamreč u joj ničoha niama histaryčnaha. Heta mulaž, jak «paciomkinskaja vioska», — kaža mastak.
Mahiloŭski daŭhabud. Jamu bolš za dva dziasiatki hadoŭ. Srodkaŭ dabudavać korpus Biełaruska-rasiejskaha ŭniversytetu niama
«Mnie ciažka kazać, jakuju nahruzku jana budzie nieści, — dadaje jon. — Kali jana tryjumfalnaja, to pavinna być prymierkavanaja da niejkaj pieramohi. A kali prostaja, jak «Słuckaja brama», dyk navošta jana tam, kali praź jaje nichto nia jedzie?»
