«Kali inśpiektary DAI afarmlali dakumienty, jana prosta z butelki adpiła jašče niekalki hłytkoŭ»
Pjanaja ciažarnaja žančyna ŭčyniła DTZ u vioscy Vialikija Matykały.
Žycharka vioski Vialikija Matykały Bresckaha rajona nie tolki sieła pjanaj za rul lehkavoha aŭtamabila, ale i ździejśniła na im DTZ, prajechaŭšy ŭsiaho tolki niekalki dziasiatkaŭ mietraŭ, paviedamlaje sb.by.
Načalnik adździaleńnia ahitacyi i prapahandy DAI UUS Bresckaha abłvykankama Natalla Sacharčuk padzialiłasia padrabiaznaściami:
— Žycharka Vialikich Matykałaŭ, kirujučy aŭtamabilem Ford Sierra, ruchałasia pa vulicy Centralnaj, dzie sutyknułasia z pryparkavanym na abočynie aŭtamabilem Renault Laguna. Abiedźvie mašyny atrymali miechaničnyja paškodžańni.
Paśla avaryi kiroŭca prajechała jašče niekatoruju adlehłaść, pakul jaje nie spyniŭ učastkovy inśpiektar. Na miesca zdareńnia prybyli supracoŭniki DAI. Padčas razboru vyśvietliłasia, što napiaredadni pajezdki žycharka Vialikich Matykałaŭ razam ź siabroŭkaj užyvała ałkahol. Potym vyrašyła padvieźci jaje dadomu. Prajechać treba było mima niekalkich damoŭ, na hetaj karotkaj adlehłaści kiroŭca i ŭčyniła DTZ.
Praviedzienaje miedaśviedčańnie paćvierdziła najaŭnaść u jaje ŭ kryvi ałkaholu - 1,7 pramile. Kali inśpiektary DAI afarmlali dakumienty, jana prosta z butelki adpiła jašče niekalki hłytkoŭ. Pry hetym śćviardžała, što znachodzicca na čaćviortym miesiacy ciažarnaści…
U dačynieńni da parušalnicy składzieny administracyjnyja materyjały. Akramia pazbaŭleńnia pravoŭ kiroŭcy na 5 hadoŭ, joj daviadziecca vypłacić štraf u pamiery 65 bazavych vieličyń.
