Cana rasijskaha hazu dla Biełarusi praktyčna nie źmienicca
Rasieja budzie pastaŭlać Biełarusi haz za $ 130 za tysiaču kubamietraŭ, raspavioŭ Alaksandr Łukašenka. Hazavaja sprečka Maskvy i Minska była vyrašana 3 krasavika.
Fota Kremlin.ru.
Zhodna z novymi damoŭlenaściami, Biełaruś budzie płacić za rasijski haz $ 130 za tysiaču kubamietraŭ. Pra heta paviedamiŭ kiraŭnik krainy Alaksandr Łukašenka na naradzie ab prablemach i pierśpiektyvach raźvićcia biełaruskaj navuki.
Jon rastłumačyŭ, što cana na pryrodny haz pryviazvajecca da nafty, tamu, u vypadku źnižeńnia cany barala nafty, padaje i cana na haz. Pavodle słoŭ Łukašenki, pa toj formule Minsk pavinien byŭ płacić da $100 za tysiaču kubamietraŭ hazu. Adnak Rasija vyrašyła pavialičyć košt da $130, patłumačyŭšy, što heta minimalnaja cana ŭ paraŭnańni z suśvietnym rynkam.
«Takoj cany ŭ śviecie niama — heta sapraŭdy praŭda. Ale praŭda i ŭ tym, što my ŭ Sajuznaj dziaržavie, u nas adzin rynak, my pavinny mieć roŭnyja ŭmovy dla ludziej, subjektaŭ haspadarańnia», — miarkuje kiraŭnik Biełarusi.
Pavodle słoŭ Łukašenki, prezident Rasii Uładzimir Pucin zapeŭniŭ jaho, što nie choča paharšeńnia ekanamičnaj situacyi ŭ Biełarusi.
Adnak u intaresach Maskvy — dakončyć vykanańnie kantraktu, u jakim cana ŭkazana ŭ $130 za tysiaču kubamietraŭ hazu. Baki vyrašyli pajści na kampramis i damovicca, što vydatki buduć kampiensavanyja za košt reekspartu nafty.
«Heta vyhadna. Pucin u mianie pytajecca: «Ty viedaješ, kolki heta ŭ hetym hodzie budzie? Paŭmiljarda dalaraŭ», - skazaŭ Łukašenka.
Prezidenty Rasii i Biełarusi sustrelisia ŭ Strelnie pad Pieciarburham 3 krasavika. Tady jany abjavili, što Maskva i Minsk vyrašyli ŭsie sprečnyja pytańni, jakija tyčacca ceny na haz.
